EOS M5雙像素CMOS AF 7fps追擊目標

專業級相機向來予人笨重的感覺，想出街影相時Pro得嚟又輕便，不妨考慮Canon新推出的EOS M5無反相機，特別加入雙像素CMOS自動對焦系統（DAF），不僅將連續對焦的連拍速度提升至7fps，操作反應比上代更添靈敏，畫質仲拍得住單反相機！

EOS M5備有3.2吋翻揭式屏幕，配合雙像素CMOS輕鬆捕捉動感影像。售價：$7,880（淨機身）、$9,080（連15~45mm鏡頭套裝）

輕鬆捕捉連環出拳

EOS M5機身淨重380g，勝在機仔細細，女士們單手拎機都冇問題，配以2,420萬像素APS-C感光元件及DIGIC 7影像處理器，令操作反應和畫質大幅提升。現場以模特兒連環出拳試拍，連續對焦時的連拍速度達每秒7張，鎖定對焦後甚至可將速度提升至每秒9張，輕鬆捕捉每個細緻動作。新增的雙像素CMOS自動對焦系統（DAF）應記一功，皆因它結合成像與相位檢測對焦，大幅提升對焦速度和準繩度，這技術過往只用於單反相機上，今次首度植入EOS M系列無反相機，令操控性比同級機種強得多。

取景捽芒揀對焦點

作為高階無反機種，新機植入0.39吋236萬點電子觀景器，畀一班用慣觀景器取景嘅影友更易掌握，另新增Touch and Drag AF功能，當使用觀景器取景時，機背屏幕可充當對焦點觸控板，透過捽芒便能選擇對焦點，仲可以揀整個、一半或一角面板操控，迎合不同人的使用習慣，機身前方則備有快捷鍵開關此功能。此外，機背的3.2吋屏幕能夠向上揭85度及向下翻180度，以便自拍或作多角度取景，啱晒Selfie一族使用。

EOS M5淨重僅380g，而且手柄設計夠深，就算單手都可緊握相機。	2,420萬像素APS-C片幅感光元件，成像質素媲美單反。	機身設有多個轉盤，利用「Dial Func.」按鍵可快速切換感光度、白平衡等。
除咗HotShoe之外亦內置閃光燈，抓拍時可進行補光。	電量足夠影約295張相片，又或者拍攝1小時25分鐘影片。	Touch and Drag AF功能可揀整個、一半或一角面板來選擇對焦點。

電子五軸防震拍片

除咗影相功能夠齊，新機在拍片方面亦照顧周全，可攝錄1,080@60p影片外，亦增設結合型動態穩定技術（Combination IS），拍片時會使用機身的電子五軸防震，以及個別STM鏡頭的兩軸防震，提升影像的穩定性，小記實試邊行邊拍，畫面都唔會搖來搖去，咁就唔怕睇到人頭暈。此外，機身植入Wi-Fi和藍芽功能，可配對《Canon Camera Connect》手機App作遙控，實試同步率高之餘，還有着低耗電的優點。