Range Rover Evoque Convertible HSE Dynamic越野無阻隔

SUV講求的是實用，跟優皮好似唔係幾扯得上關係，但如果將SUV同開篷車撈埋一齊，合體變做開篷SUV，咁你又會點睇？建基於Evoque開發的Evoque Convertible並唔係齋玩樣，實情卻非常有內涵，Land Rover著名的Terrain Response及Torque Vectoring by Braking均為標準配備，On/Off-road的表現都一樣咁得！

Range Rover Evoque Convertible HSE Dynamic<br>售價：$898,000起

Range Rover Evoque Convertible HSE Dynamic
售價：$898,000起

電動軟篷分外瀟灑

開篷SUV並唔係Land Rover首創，過往曾有車廠推出過，惟市場反應非常一般，上市冇耐便停產，如今Land Rover投放大量資源開發開篷Evoque，確係心口掛了個「勇」字！Evoque Convertible的概念版早在2012年於日內瓦車展登場，三年多後實現量產，雖然暫未有銷售數據，不過從過去幾年車迷及媒體在不同平台的熱烈討論程度來看，無疑已先勝一仗。開篷Evoque與硬頂版最大分別當然是車頂部分，廠方將原來的硬頂改為軟篷，而且採用全電動操作，打開、關閉的時間分別只需18及21秒，行車途中（48km/h）都可如常操作，幾咁瀟灑！

車廂布局與硬頂版相若，走豪華動感路線。

波箱設有九前速，能夠以極低轉速巡航。

Terrain Response屬標準配備，足以應付崎嶇野路。

後排雙座舒適闊落

因應開篷車的特別安全結構，加上車尾要預留位置收納篷頂，載物空間難免要犧牲一點，買得開篷車要預埋呢點，要型、要潮，就要取捨。Evoque Convertible以Full-size四座位設定，後排絕非兒童專用席，成人坐都全無問題，冇話傳統2+2座位開篷車那種頂頭頂腳的逼狹感，呢方面可加唔少分數。開住篷玩越野，諗落其實幾有趣，官方宣傳片更在沿海的淺水中行車，看來多有型，假如你都有咁嘅打算，先停一停、諗一諗，筆者沒懷疑閣下的駕駛技術，亦沒有懷疑過Land Rover的Off-road涉水能力，但濺起的泥水分分鐘搞到啲車廂一撻二撻泥漬，三思而後行呀！咁仲點解要買SUV Convertible？有時買嘢唔一定要理性，覺得好玩、新潮、型就得啦，在郊區野路開住篷揸又真係幾爽嘅。

前排座椅設有12方向電動調校，可設定合適坐姿。

開篷Evoque以四座布局，前、後排都有不錯的乘坐空間。

尾箱空間只是一般，未必放得落大型行李。

內輪制動提升轉向

今次試駕的版本為Range Rover Evoque Convertible HSE Dynamic，搭載的2.0公升Si4渦輪增壓引擎可輸出馬力240ps，數值同硬頂版一樣，惟開篷版的車體較重，加速力及燃油效率都略有影響，0~100km/h需時8.6秒，每百公里油耗為8.6L，還不錯吧。為提升On-road的操控性能，原廠已將Torque Vectoring By Braking列為標準配置，當汽車轉彎時，系統會對內圈車輪施加輕微制動來協調四輪轉速，不但有助減少出現轉向不足的機會，操控亦更靈活穩定。代理指，Evoque Convertible HSE Dynamic的出車設備已包括20吋輪圈、主動式LED頭燈、無匙系統、環迴攝影鏡頭等等，售價為$898,000起。