黑道風雲GO AR全球搶地盤
早前《Pokémon GO》掀起全民捉寵熱潮，遊戲結合AR擴增實境和GPS定位玩法，吸引咗唔少人四圍捉精靈。本地手機遊戲開發商Gameone看準時機，聯同本地科技園公司Innopage及美國遊戲公司Tommo，炮製以黑幫爭地盤為主題嘅定位遊戲《黑道風雲GO》，透過AR大玩攻防戰，一於請Gameone主席施仁毅分享創作遊戲嘅心路歷程。
全球黑道角色人設
叫得做《黑道風雲GO》，遊戲核心當然係圍繞黑道人物，再加入GPS定位和AR玩法提升玩味，最吸引是遊戲唔單止香港玩到，基本上喺世界任何地方都玩得到。施仁毅表示：「遊戲人物係參考全球不同黑幫嘅造型，例如有意大利黑手黨、日本山口組等，另外亦有電影、小說、漫畫等角色，依家同香港漫畫《古惑仔》、台灣電影《艋舺》等傾緊版權，加上人設搵咗日本設計師負責，令整體趨向國際化。」
著名地標為資源點
唔好以為《黑道風雲GO》係抄足《Pokémon GO》，其實早喺十多年前，香港已經有定位遊戲，施仁毅解釋：「嗰陣時未有Google Maps，定位遊戲嘅地圖需要開發商自己製作，如《Impossible Team》、《追蹤黑夜女神》等均透過電訊商啟動定位去搜尋寶物，之不過每次定位都要畀錢，所以遊戲未能普及。《黑道風雲GO》採用美國著名地圖公司炮製嘅地圖，上面會擺放立體建築物作為資源點，當然呢啲建築物係大家熟悉嘅地標。」有一點較像《Pokémon GO》的「落櫻」，就是玩家可發放「穿雲箭」去召集兄弟。
開AR跟黑幫角力
咁《黑道風雲GO》用乜嘢嚟「收口靚」？施仁毅強調：「既然遊戲以黑道為主題，見到黑幫梗係對打，玩家可以閃避對方攻擊之餘，被打中亦有打爆芒效果，打贏咗即可成為兄弟，而開AR對打嘅能力值會較高，比起捉精靈刺激得多。此外，遊戲加入咗警察角色，玩家連續打倒一定數量嘅黑幫會增加『出位度』，遇到警察隨時會被追捕，呢點就同《GTA》差唔多。」
自創聯盟霸地盤
《Pokémon GO》嘅戰鬥系統較弱，玩得耐始終會悶，施仁毅指出：「製作《Pokémon GO》嘅團隊其實係由Google Maps起家，並唔係專門設計遊戲，而《黑道風雲GO》就加入咗競技元素去強化耐玩性，除咗打古惑仔之外，玩家亦可以自創聯盟和結盟。而且可以一班人去爭奪敵對陣營嘅地盤，唔係一對一咁單調，加上遊戲會加入排行榜，可以睇到全世界玩家嘅排名，令遊戲更具競爭性。」
其他人氣AR Games
除咗有本地公司開發AR Games之外，其實全球各大小遊戲商均朝向這方面發展，並加入射擊、塔防等元素，令人期待。
《Clandestine: Anomaly》抵擋外星人
加拿大開發商ZenFri研發嘅《Clandestine: Anomaly》，係一款用上AR技術嘅塔防遊戲，利用手機鏡頭顯示現實環境後，會有虛擬外星人襲擊你，玩家需要築起防線不停抵擋敵人。虛擬畫面質素幾高，無論係敵人或爆炸效果，都靚過好多同類遊戲，惟iOS版售價$28，Android版只有頭4 Levels免費。
《father.io》現實變戰場
早前喺Indiegogo集資嘅《father.io》，是結合AR和GPS嘅第一身射擊遊戲，玩家只要喺手機裝上Inceptor鏡頭，即可將現實世界變成戰場，組隊與其他玩家對戰。手機屏幕除咗會見到真實世界，仲加入虛擬槍械，篤芒即可射擊敵人，然後以特定手勢上子彈，似足AR版War Game，惟現時未有確實推出日期。