瘋搶亮黑iPhone 7嚴選上台計劃

計算機價總開支

喺電訊商上台出機，每個月費計劃都有唔同機價和預繳，驟眼睇都唔知邊個最抵。尤其是iPhone 7/7 Plus分不同容量版本，想搵出啱用嘅上台計劃，最簡單係計算總開支，將基本月費、增值服務及行政費乘以合約期，之後加上機價便可得出結果。譬如喺3HK以$298（1GB）月費上台出iPhone 7 Plus 256GB，基本月費$298，再加上$18行政費、$39增值服務，並簽約24個月，兩年開支為$8,520，再加上$3,380機價，總開支是$11,900（平均每月約$495.8）。最令人混淆係預繳費用，皆因電訊商會將預繳金額分24期回贈予客戶，並於基本月費扣除，換言之毋須計算於總開支上。

4大電訊商出機Plan

小記特別將3HK、中國移動、數碼通及csl. 4大電訊商，上台出iPhone 7/7 Plus嘅總開支計算。若想出亮黑iPhone 7 Plus，總開支最平係中國移動，以$268月費（1GB數據）出32GB版本，只需$10,136（平均每月約$422）。如果以10GB高用量選擇256GB版本iPhone 7 Plus，則以3HK及csl.的總開支$16,680最抵。留意3HK、中國移動、csl.均有４款數據用量計劃供選擇，唯獨數碼通只提供1GB、2.5GB、6GB數據用量計劃。

5色iPhone 7/7 Plus中，以亮黑大機（右）最多人搶，炒價亦較高。	計算總開支就知邊個Plan啱用！（設計對白）	旺角路邊攤檔有唔少收機佬，價比三間冇蝕底。

優惠各自不同

除咗比較總開支之外，其實仲可睇埋唔同電訊商嘅賣點和優惠。中國移動提供本地數據月費計劃外，另有「飛常大中華」月費計劃，雖然比原有計劃每月貴$20~$50，但數據用量就適用於香港、中國內地、澳門及台灣，適合經常往返這些地區嘅人士。而csl.嘅中高用量月費計劃，可以免費睇「樂視體育Now英超1台」，隨時拎起手機足球直播都冇問題。3HK就推出「7重賞」，當中較吸引嘅有Casetify自訂機殼、最高$4,000賠償嘅6個月手機保險等。數碼通用家則可以月費$16選用「全球漫遊數據通」，每月包一日漫遊數據日費計劃，啱晒鍾意外遊嘅人士。

上台出機月費計劃	放大圖片	放大圖片

劏機有着數？

根據以往經驗，iPhone推出首幾天都會出現炒價，上台出機嘅用家除咗可以自用，亦可用來「劏機」將新機放售。假設用家於3HK以$298月費計劃出iPhone 7 Plus 256GB，總開支為$11,900，若然新機炒價逾$11,900的話，用家變相免兩年月費。若然炒價為$10,000的話，將總開支扣減之後，用家只需付出$1,900，平均月費僅$79左右，出個新Number用嚟做後備SIM卡都抵啦！提提大家，部分電訊商於出機時會即場打開包裝盒及啟動手機，去先達放機時有機會被壓價。

備註：4大網絡商的iPhone出機合約期為24個月，每月行政費$18，增值服務則每月分別收$33（中國移動）、$36（數碼通）、$39（3HK、csl.），另提供指定通話分鐘。亮黑iPhone 7/7 Plus不設32GB版本，實際上台出機費用以網絡商作準。

撰文：林子聰

部分攝影：方偉堅

模特兒：Michelle（Reborn Production）