年輕人都啱BMW 220iA Gran Tourer Urban

設備減 依然不齋

走多元休閒路線的2-Series Gran Tourer，車身設計並沒有如傳統MPV般方方正正，看上去不但富動感，後生仔女都不會被人話「揸咗阿爸部車」咁無癮，還有非常見使的車廂空間，相信年輕家庭及喜愛運動的人士會最為受落。今次輸港的Urban版雖刪減了一些設備，卻又稱不上是齋版，頂多只能說冇咁豪，只是剔走了電尾門、Park Assist等平時冇幾可用得着的設備，換轉是我，都寧願平幾萬好過。同時，Urban版的座椅皮革亦換上Sensatec，車廂雖少了BMW的皮味，質感也沒有Dakota、Nappa咁高檔次，但乘坐質素還是不錯，而且通風透氣，若不介意用人造皮，實在無花錢升級的理由。

多功能Sport軚環以皮革包裹，後方還設有加減波撥片。	中控台設有6.5吋屏幕，而且連接了後泊車鏡頭。	後排設有雙座位，不過不太適合高個子人士。

實用座椅 開揚天窗

2-Series Gran Tourer屬於Compact MPV，體積不會弄得很大，雖設有七個座位，但後排就比較適合兒童多啲，偶爾會載埋朋友去BBQ、個個都係大人咁點算？都冇話唔得嘅，2-Series Gran Tourer的座椅編排可靈活調配，除了中及後排椅背可翻平外，整個中排更可作前後移動，空間分配全由自己話事，行李箱容量最多更可擴展至1,820公升，實用性頗高。事實上，Urban版的設備一啲都唔齋，不但有雙區恒溫冷氣，就連Panorama玻璃天幕都列為標準配備，其面積幾乎覆蓋A至C柱，無論你身處哪一個位置，抬頭便有開揚視野，駕與乘都倍感寫意。

中排座椅可前後移動，中及後排的空間運用更加靈活。	車頂天幕面積巨大，大大消除了車廂壓迫感。	中及後排椅背都可向前翻平，藉此提升車尾載物量。

重心低 彎路平穩

駕駛樂趣是BMW的造車理念，就算2-Series Gran Tourer沒採用BMW慣常的FR布局，但底盤調校依然有一手，加上重心低，彎路平穩及靈活性都比一般MPV唔知好幾多倍，兼顧到駕與乘需要，長途駕駛都不會苦了爸爸。今次的試駕型號為220iA Gran Tourer Urban，動力系統由2.0公升直四BMW TwinPower Turbo引擎及八前速Sport自動波箱組成，在渦輪增壓的加持下，扭力帶相當廣闊，任何時候畀油都有敏捷的加速反應，7.7秒完成0~100km/h的性能，試問有幾多40萬元以下級別的MPV做得到？另一方面，新車還預載了Performance Control，當汽車轉向時，動力及煞車系統可按需要對個別車輪提供不同程度的動力輸出或制動力度，操控表現及行車安全性都得到進一步提升。

引擎有強大的扭力輸出，加速反應敏捷。

放大圖片

規格表

車型：五門七座位MPV

引擎：直四BMW TwinPower Turbo

容積：1,998c.c.

最大馬力：192hp/5,000~6,000rpm

最大扭力：280Nm/1,250~4,600rpm

傳動：八前速Sport自動波

驅動：前置引擎、前輪驅動

0~100km/h：7.7秒

綜合油耗：6.2L/100km

車身體積：4,556×1,800×1,641mm（長×闊×高）

撰文：鄭浩文

攝影：張錦昌

查詢電話：3129 9000（BMW HK）