柏林IFA直擊！Gadgets大打親民牌

德國柏林舉行嘅IFA，被視為每年壓軸科技界大騷，自然成為各廠發布新機嘅盛會，今年尤以手機類最為搶眼，Huawei、LG等都有大量中階機款推出，大打親民牌。另一邊廂，智能手錶、Action Cam、超高清電視等也有新亮點，睇頭十足！
nova（左）及nova plus（右）規格接近，分別用上5吋及5.5吋屏幕。
nova（左）及nova plus（右）規格接近，分別用上5吋及5.5吋屏幕。

流動篇：Huawei nova雙機強攝

近年智能手機喺IFA展覽搶盡焦點，今年亦唔例外，當中國產大廠Huawei帶來nova及nova plus手機，同樣採用金屬機身，前者用上5吋全高清屏幕；後者則改用5.5吋大芒，而且機面換上2.5D弧面玻璃，外形更靚仔。硬件規格上兩機相當接近，Qualcomm Snapdragon 625八核心處理器、3GB RAM、32GB ROM及指紋辨識器，配以Android 6.0作業系統，效能算是中上水平。最大分別是nova用上1,200萬像素鏡頭，而nova plus將鏡頭提升至1,600萬像素，並提供OIS防手震技術、4K拍片等功能。

現場特別搭建咗一個足球模型場景，供在場人士以nova及nova plus試拍。
  • 現場特別搭建咗一個足球模型場景，供在場人士以nova及nova plus試拍。
Android平板MediaPad M3備有8.4吋2,560×1,600解像度屏幕，雙喇叭更支援Harman Kardon音效。
  • Android平板MediaPad M3備有8.4吋2,560×1,600解像度屏幕，雙喇叭更支援Harman Kardon音效。
採用Windows作業系統嘅MateBook可以當平板使用，亦可搭配其他配件變身筆電。
  • 採用Windows作業系統嘅MateBook可以當平板使用，亦可搭配其他配件變身筆電。

nubia Z11 邊框操控

同樣來自內地嘅廠商nubia都有擺出新型號手機Z11，以超窄邊框作賣點，掃動邊框即提供不同功能，好似兩指於左右邊框同時掃動可調校屏幕亮度、掃動右邊框可切換程式等，好玩兼實用。

場內擺放咗限量版Z11，改用黑金配色，機背印有C朗簽名。
  • 場內擺放咗限量版Z11，改用黑金配色，機背印有C朗簽名。
兩指於左右邊框同時掃動即可調校屏幕亮度。
  • 兩指於左右邊框同時掃動即可調校屏幕亮度。
左至右為X mach、X power、X max及X style，分別針對鍾意極速上網、大容量電池、大芒和輕薄嘅用家。
  • 左至右為X mach、X power、X max及X style，分別針對鍾意極速上網、大容量電池、大芒和輕薄嘅用家。

LG X系四傑

韓廠LG將旗下X系列4部新機一次過晒冷，雖然只係中階機款，但各有各賣點，包括支援LTE Cat.9嘅X mach、支援快叉並內置4,100mAh大電池嘅X power、主打5.5吋大芒嘅X max，以及纖薄弧邊嘅X style，總有一款啱你要求。

ZenWatch 3首次改用圓形錶面，靚仔得多。
  • ZenWatch 3首次改用圓形錶面，靚仔得多。

潮物篇：ASUS ZenWatch 3 新U登場

除咗手機之外，當然唔少得穿戴式產品撐場，較注目的有ASUS ZenWatch 3智能錶，有別於以往ZenWatch方形錶面，新錶改用圓形設計，配以3個錶冠按鍵，外觀更似傳統手錶。錶殼提供灰、銀、香檳金3色，亦一如以往支援快拆式錶帶，備有矽膠、皮革等選擇。規格方面用上1.39吋AMOLED屏幕，並採用最新Snapdragon Wear 2100處理器，預載Android Wear作業系統，美中不足是不設心跳監測器。

LG Action Cam串流直播

另一必試的有LG Action Cam，它採用方形柱體設計，僅重99g，支援IP67防水防塵標準，1,230萬像素鏡頭可拍出150度超廣角4K@30fps或1,080p@60fps影像。特別在於Action Cam支援流動及Wi-Fi網絡，可於拍攝時直接進行串流，更加好玩。

LG Action Cam用上方形柱體設計，可搭配自拍棍等使用。
  • LG Action Cam用上方形柱體設計，可搭配自拍棍等使用。
Action Cam可連接手機App，實時預覽拍攝影像。
  • Action Cam可連接手機App，實時預覽拍攝影像。

影音篇：Sharp 85吋8K電視搶眼

Sharp今年帶來85吋LV-85001 8K電視，用上自家IGZO技術，令像素排列更緊密，加上ACE PRO ULTRA圖像引擎將畫質提升至7,680×4,320解像度，亮度達1,000cd/m2，雖然新機仲未正式量產，但日本已經有賣出紀錄呢！同場展示一系列概念產品，包括結合Frameless無邊框、Free­Form不規則面板等設計，顯示屏能夠造成三尖八角，感覺科幻。

Sharp推出號稱全球首部85吋8K IGZO TV。
  • Sharp推出號稱全球首部85吋8K IGZO TV。
不規則面板模擬汽車錶板，夠晒新鮮。
  • 不規則面板模擬汽車錶板，夠晒新鮮。

BeoVision Horizon聲畫俱備

歐洲代表Bang & Olufsen有全新4K電視系列BeoVision Horizon，備有40吋和48吋兩款型號，採用鋁金屬電視框架，配合類似百葉簾設計的機底喇叭，時尚型格。廠商同時推出花瓶形狀嘅BeoSound 1及BeoSound 2無線喇叭，音色雄渾有勁，擺喺客廳「焚歌」一流。

B&O 48吋BeoVision Horizon售4,395歐元，另有40吋型號售2,995歐元。
  • B&O 48吋BeoVision Horizon售4,395歐元，另有40吋型號售2,995歐元。
BeoSound 1（左）及BeoSound 2（右）無線喇叭的外形似足花瓶，音色響亮。
  • BeoSound 1（左）及BeoSound 2（右）無線喇叭的外形似足花瓶，音色響亮。

Panasonic次世代4K原型機

日系大廠Panasonic展示正在研發嘅次世代4K Pro HDR OLED TV原型機，以荷里活專業級人士來調校色彩效果，加上內置獨家影像處理器技術，現場試睇暗位紮實、飽和度恰到好處，令人期待。同時官方推出專業級4K攝錄機HC­-X1，具備24mm LEICA DICOMAR鏡頭，並支援20倍光學變焦，預計12月上市。

Panasonic次世代4K Pro HDR OLED TV，現場黑位表現出色，令人期待。
  • Panasonic次世代4K Pro HDR OLED TV，現場黑位表現出色，令人期待。
4K攝錄機HC-­X1採用24mm LEICA DICOMAR 20倍光學變焦鏡頭，走專業路線。
  • 4K攝錄機HC-­X1採用24mm LEICA DICOMAR 20倍光學變焦鏡頭，走專業路線。
IFA由即日至9月7日在德國柏林舉行，吸引全球各大廠商參展。
  • IFA由即日至9月7日在德國柏林舉行，吸引全球各大廠商參展。
Panasonic展區搞咗個200m「划艇」比賽，勝出者可獲贈運動耳機。
  • Panasonic展區搞咗個200m「划艇」比賽，勝出者可獲贈運動耳機。
IFA展覽當然唔少得電視頻道展區，仲有個仿製柏林電視塔！
  • IFA展覽當然唔少得電視頻道展區，仲有個仿製柏林電視塔！
點解郁吓隻手就可遙控BB-8？原來帶咗Sphero嘅特製體感手錶。
  • 點解郁吓隻手就可遙控BB-8？原來帶咗Sphero嘅特製體感手錶。
喺裝甲車頂打碟夠晒霸氣，現場氣氛勁High。
  • 喺裝甲車頂打碟夠晒霸氣，現場氣氛勁High。

特派記者：林子聰、廖俊斌