叭閉回歸！Sky IM-100轉出創意

韓系手機一直由Samsung和LG壟斷，早年還有第三大嘅Pantech抗衡，但自2014年出完Vega A920（Pop-Up Note）後，一直未有新機抵港。事隔兩年，Pantech正式回歸手機界推出Sky IM-100，機背加入創意十足嘅Wheel Key轉輪之外，跟機送埋幻彩藍芽喇叭兼無線充電座Stone，勁有睇頭！

Sky IM-100 售價：$3,180

多功能Wheel Key

Pantech手機嘅設計向來有心思，IM-100用上方角霧面機身，驚喜位落在機背，將傳統嘅音量按鍵變為一個金色Wheel Key轉輪，上下轉動即可調校音量大小，還設有0~100級供用家微調，相當仔細。而屏幕開啟時，於側面按下Wheel Key即可啟動音樂播放器，再按可播放音樂；拍攝時則可將Wheel Key變成快門鍵，轉動Wheel Key還可啟動倒數拍攝；於播放器睇片時，Wheel Key亦可用作調校前後快播，功能多多。美中不足係用家不可自訂其他快捷功能，否則更加實用。

Sky IM-100採用霧面機身，機面不設按鍵。

機背左邊設有金色Wheel Key，旁邊備有七色LED燈。

聽筒採用圓形設計，左邊備有一顆LED提示燈。

Android 6.0中階機款

規格方面，5.15吋全高清屏幕、Snapdragon 430八核心處理器、2GB RAM及3,000mAh電池，整體只屬中階水平，不過用嚟上網、玩《Pokémon GO》等亦見流暢。而且軟件有唔少花臣，預載的Android 6.0系統提供多個主題頁面，加上圖示風格、系統字形統統有得轉款，包保唔會悶。而機身備有500萬像素前置及1,300萬像素後置鏡頭，前者內置美顏及HDR功能，後者追加8款濾鏡，影相質素都唔錯。

支援nanoSIM及microSD記憶卡，跟機附送專用卡針。

採用microUSB介面，喇叭則設於機底。

屏幕亮起後按Wheel Key，會彈出音樂播放器介面，再按便可播歌。

無線充電幻彩喇叭

除咗手機，不得不提跟機附送嘅配件。盒子外形嘅Stone其實係一個便攜喇叭，機身前方設有金色音量轉輪，與IM-100可以話係絕配。喇叭機頂還加入玻璃物料，可轉換不同顏色LED當作家居擺設。最吸引是支援NFC及藍芽功能，將手機放上喇叭即可完成配對；而喇叭本身亦內置2,600mAh電池，可連續播放10小時音樂。手機已預載《Stone Manager》應用程式，可遙距調校喇叭的LED顏色、開機/關機時間及鬧鐘功能。用家只要將Stone透過microUSB連接電源，仲可將它化身成無線充電器，手機放上去即可充電。

於屏幕亮起時上下滾動Wheel Key，可逐級微調音量。	攝影介面簡單易用，可透過Wheel Key啟動倒數拍攝功能。	內置多款主頁風格，新鮮感十足。
備有《Stone Manager》，可為Stone進行不同設定。	提供大量圖示花款，啱晒鍾意個人化介面嘅用家。	試相區於日光下以1,300萬像素鏡頭拍攝，放大後花瓣仍見實淨，顏色自然。