攝戰體壇盛事快門先決
四年一度嘅體壇盛事喺巴西里約熱內盧舉行得如火如荼，網上成日見到啲靚絕嘅運動相片，每每捕捉到運動員咬牙切齒、爭分奪秒嘅精彩時刻。若各位對運動攝影感到興趣，但又唔熟相關要訣的話，一於等香港運動攝影協會會長Aries，教大家基本三式攝戰體壇盛事！
第一式：快門凝固動態主體
運動攝影唔同影人像，所追求嘅係動感效果，故此快門控制比光圈控制更為重要。Aries表示：「由於運動員多數郁得好快，快門太過慢好易鬆郁朦，故建議新手使用快門先決，有一定基礎後才改用全手動設定。至於快門速度最好保持1/500s以上去凝固主體。雖然高速快門嘅拍攝成功率較高，不過影出嚟嘅畫面有時會欠缺動感，當各位掌握到拍攝技巧後，可將快門速度逐步調低，例如1/125s等，令部分畫面有殘影或模糊感，影賽跑、單車等競賽運動時甚至可以慢快門『Pan鏡』。」
第二式：陷阱對焦等待主體
運動場上經常聽到相機快門聲好似機關槍般掃射，其實相機嘅連拍速度唔單止要高，對焦仲要夠快夠準，一般運動攝影會使用「連續對焦」。若果相機嘅對焦速度唔高的話，Aries都有計：「每種運動都有一個位置可以拍到最精彩嘅畫面，例如跨欄嘅欄頂、籃球嘅籃底等，大可使用陷阱對焦法，利用單次對焦加上半按快門對準呢啲位置，待主體一到即可按下快門，大約連拍3張左右就可以，分別是前、中、後嘅動作，藉此提高命中率。」
第三式：睇YouTube預測動作
若不太熟悉想影嘅運動，各位未必會知道邊個位置或畫面最靚，所以Aries建議：「大家可事前上YouTube睇吓想拍攝嘅運動，留意每位運動員嘅細微動作，例如乒乓球項目最精彩嘅畫面係抽擊，球手在抽擊前好多時會拉弓，呢個時候就要準備連拍，直至個波差唔多碰到球拍就要影。因為唔熟悉嘅運動只會被主體帶住走，就算一啲運動攝影老手，都唔係樣樣運動影得好，所以事前準備工夫相當重要。」
運動攝影相機推介：單反之選：EOS-1D X Mark II 14fps高速連拍
單反相機嘅系統較為成熟，而且對焦快、連拍速度高，當中Canon EOS-1D X Mark II可以14fps連拍捕捉主體。鏡頭方面可選擇200~400mm F4 1.4×，內建1.4×增距器能將焦距擴展至280~560mm，適合在觀眾席遠距離捕捉運動員姿態。
Nikon D5 雜訊控制出色
Nikon D5旗艦級單反備有12fps連拍速度，最吸引是在高ISO時提供良好的雜訊控制，適合在室內或唔夠光嘅環境拍攝。鏡頭方面可揀全新200~500mm F5.6型號，不但有靈活的Tele焦段，光圈亦有F5.6，而且定價萬多元經濟抵玩。
無反之選：LUMIX GX85 五軸防震系統
無反相機雖然在性能和速度不及單反，但Panasonic全新M4/3無反LUMIX GX85擁有兩倍轉換系數，當配上100~400mm鏡頭時可變成200~800mm焦距咁遠，有利捕捉遠距離主體。而且重量比單反輕，手持拍攝情況下冇咁易手震；加上新機內置五軸防震系統，可減低手震造成嘅震動。
Aries's Profile
攝影年資近30年，2004年成立香港運動攝影協會，致力推廣運動攝影及協助香港運動項目進行拍攝，藉此回饋社會。
網址：www.hkspa.org
查詢電話：（A）3191 2333、（B）2907 1122、（C）2833 0955
撰文：黎子豪（部分相片由香港運動攝影協會提供）