Volkswagen Golf GTI Clubsport最強之名

Volkswagen於1976年發表的Golf GTI，相信車迷都唔會陌生，適逢今年是GTI誕生40周年，廠方推出特別版車型Golf GTI Clubsport慶生。部車有咩咁特別，值得用$40萬去買？憑史上最強GTI之名，加上全港得40部配額，夠誘因未？

Volkswagen Golf GTI Clubsport 售價：$399,980

以Performance版升級

Volkswagen最初開發Golf時，定位只是經濟型平民小車，殊不知當時有6位工程師忽發奇想，想製造一輛「Sports Golf」，最終花了2年時間，擁有110匹馬力的首部GTI於1976年正式投產，182km/h的最高時速，風頭可謂一時無兩。經過7代的演變，標準版的Golf GTI已有220匹馬力，Performance版再多10匹，而且配備全新前軸差速鎖，是次為紀念GTI誕生40周年推出的Golf GTI Clubsport，便是以此型號為藍本升級，並可藉由超增壓模式將馬力提升至290匹，成為Volkswagen史上最強的GTI。

在超增壓模式下，引擎可輸出290ps馬力。

車頂裝上賽車化擾流尾翼，令賣相更加煞食。

側鏡換上黑色殼，並整合了指揮燈。

超增壓模式去盡290匹

Golf GTI Clubsport本身的馬力輸出是265匹，想去到290匹就要用到超增壓模式，這時馬力可短暫增加10%，感覺好似細個打機咁，幾過癮！要啟動超增壓唔使撳任何掣，只要用S波或3波以上盡油就得，每次可維持10秒之久，咁0~100km/h可以幾快呢？DSG版係6.3秒，係咪諗起都爽呢？同時，Golf GTI Clubsport配備了運動懸掛，離地距較標準版降低15mm，而且裝咗電子差速鎖XDS+，就算用上頗快的車速過彎，都沒出現大馬力FF車常見的Under-steering，彎路極限比想像中高得多。若然你買咗部MK7 Golf GTI冇幾耐，建議唔好約試車喇，怕你傷心啊！點解？相比起Golf GTI Performance，Clubsport版只係貴$2萬咋！

原廠配上18吋輪圈，輪胎尺碼為225/50 R18。

中控台設有觸控式顯示屏，而且可顯示馬力輸出計、Bar數等資訊。

雙出左右尾喉是Clubsport專屬款式，跑味濃烈。

跑格媲美Supercar

其實，Clubsport版唔止性能有所提升，就連外觀及車廂設備都得到全面升級，無論是擾流套件、進氣口、排氣尾管以至賽車化尾翼，全部都換上專屬的Clubsport版款式，運動形象更加強烈。打開車門、坐上駕駛席，首個反應是「嘩」了一聲，那張由纖維布料及人造麖皮縫合的賽車桶椅，其包裹性直情可媲美Supercar，能有效穩住身軀因汽車轉彎時出現的擺動，並兼顧到舒適性，加上軚環上12點位置的紅色標記，雖然實際用途不大，卻令人如置身落場賽車的感覺，GTI迷點能錯過呢？