三大潛攝熱點鯊魚海龜做Model

暑假係旅遊旺季，潛水發燒友總愛帶齊裝備深入海底影靚相。想平平哋影到海洋美態，東南亞及台灣的潛攝熱點絕對係首選，香港潛攝大賽冠軍Victor（劉偉達）就推薦菲律賓馬拉帕斯加、台灣綠島和印尼峇里，影盡長尾鯊、翻車魚、海龜等香港難得一見的生物，啱晒鍾意新奇刺激嘅香港人。

香港潛攝大賽冠軍Victor（劉偉達）推薦菲律賓馬拉帕斯加、台灣綠島和印尼峇里三大熱點。

菲律賓馬拉帕斯加近攝長尾鯊

菲律賓有不少潛攝熱點，較為人熟悉係PG島，此處適合潛水初學者玩，若嫌PG島冇挑戰性，Victor推薦大家去馬拉帕斯加潛攝：「馬拉帕斯加（Malapascua）的水深一般為20~30米，適合擁有進階開放水域牌的潛水員。呢度可以影到珊瑚鯊、海扇、海龍，還有大型的長尾鯊，不過想影長尾鯊要預早啲時間，我上次喺朝早5點出發，等長尾鯊早上去Cleaning Station清潔身上的寄生蟲，只要喺附近等待，好大機會影得到。」Victor表示鯊魚其實好怕人，特別係潛水放出嘅泡泡，所以想近少少影長尾鯊，就唔好咁多人堆埋一齊。

馬拉帕斯加會影到俗稱「海洋藍精靈」嘅七彩麒麟魚，兩條依偎在一起的畫面十分有趣。

要影到長尾鯊最好早少少出發，因為長尾鯊早上會清潔身體，拍攝時要有耐性。

台灣綠島微距影紙海馬

一提到台灣潛攝，唔少人會即刻諗到墾丁，之但係墾丁嘅遊客眾多，唔想同人逼的話，Victor推介台東嘅綠島：「綠島位置比較隔涉，落機後轉車轉船，差唔多要成日先去到。呢度主要影月光螺、珊瑚蟹等細小海洋生物，比較特別有好似紙咁薄嘅紙海馬，側面影會好靚。建議大家喺綠島以廣角影埋水底景觀，皆因這裏除咗有珊瑚群、鋼鐵珊瑚礁，仲有古老嘅珊瑚石，有很多地方取材留影。」

豐富嘅珊瑚群、珊瑚石係台灣綠島嘅特點，以廣角影水底風景已經好靚。

由於紙海馬本身好薄，故從側面影埋去有對望嘅效果。

鋼鐵珊瑚礁雖然係人工放下嘅鋼鐵框，但有很多珊瑚在上面生活。

印尼峇里抓拍翻車魚

峇里最大特色係海底有一艘自由號沉船，海洋物種相當豐富，Victor指出：「峇里嘅水流較急，加上水深一般有30~40米，適合進階玩家潛攝。自由號沉船本身係一艘美國戰艦，沉沒後成為海洋生物棲息地，呢度唔單止影到鐵頭魚、海鰻、恐龍蝦等物種，甚至可影到大型嘅翻車魚，毋須走得太近便影到。記得千祈唔好用閃光燈，因為魚類會覺得唔舒服。若果好彩的話，仲有機會遇到海龜等。」