Honda Odyssey Supreme升級歎到盡

七或八人車有好多選擇，唔止車系夠多，就算同一車系都有唔同的版本，如本田（Honda）繼早前為Odyssey引進了七座Premium及主打實用的八座版後，近日再帶來頂級的七座版車型Odyssey Supreme，除追加原廠導航及後置9吋顯示屏娛樂系統外，坐喺中排兩張大班椅睇，幾咁歎！

Honda Odyssey Supreme
售價：$455,880

後置屏幕娛樂系統

Odyssey的設計有別於傳統的箱形MPV，車身僅高1,695mm，而且重心較低，駕駛感同旅行車相似，即使車價高於Stepwgn，空間亦不及，但只憑豪華及優良操控也不愁冇客路。相對於八座版，七座車型（Premium及Supreme版）最正是中排有Ottoman座椅，多個部分都可獨立調節，配合小腿腳墊及手枕，可以坐到成個大爺咁款，真係幾爽！全新Supreme版追加了後置9吋屏幕娛樂系統，為提升使用方便度，特別在後排設置HDMI輸入口，乘客輕易便可與流動裝置連接起來，想睇乜自己晒話事，唔使伸手去前座換碟，加上側窗設有太陽簾，隨時隨地都可成為私人影院。

車廂多個部分都用上皮革包裹，前座更設有加熱功能。

中排設有2張Ottoman座椅，舒適性一流。

後排空間算不錯，大人坐都OK。

導航支援電話號碼

原廠導航同屬Supreme版的專屬配備，不但支援廣東話導引，甚至可以像日本的汽車導航以電話號碼搜尋地址，筆者輸入「2380 2231」，系統便會顯示位於九龍灣的本田陳列室地址，地圖縮放更可用2隻手指在顯示屏面板上直接控制，操作比起採用傳統的輸入地址方便得多。不過，資料庫暫時不算太豐富，用電話號碼找地址並唔係一定得，相信將來更新資料庫後會有所改善。此外，中控台的7吋觸控式顯示屏還整合了多角度泊車鏡頭，當中包括前、側、後及360度鳥瞰系統，車身周邊環境可清晰顯示，泊車自然輕鬆得多啦！

中排裝上頂置9吋顯示屏，乘客可在旅途中欣賞電影。

後排設置HDMI輸入口，輕易便可與流動裝置連接起來。

導航支援廣東話導引，並且可以電話號碼搜尋地址。

動力充沛油耗不高

全線Odyssey皆搭載2.4公升DOHC i-VTEC直噴引擎，最大馬力、扭力分別有185ps及235Nm，動力輸出充沛且線性，配合七前速CVT波箱，加速過程流暢自然，乘坐舒適性十分不錯。安全設備上，VSA、TCS等電子穩定系統全屬標準配置，同時配上斜坡輔助起步系統，於大斜路起步都唔會溜後，連同主動式轉向燈及兒童安全門鎖，為家人帶來全面保障。代理指，全新Odyssey的耗油量僅13.7km/L（JC08 H+C Mode），比上代省油22.3%，以目前油價$14.19/L計算，計落都係$1/km左右，相當經濟。