BMW M2 Coupe享受戰鬥格

BMW M代表高性能，多年來，1、3、4、5、6及X系列都有過相關車型，主打操控樂趣的2系Coupe，又豈能沒有M的份兒？最近代理帶來好消息，等到頸都長的M2 Coupe已運抵本港，唔止可在4.3秒完成0~100km/h加速，而且有六前速手波或七前速雙離合器波箱揀，八十零萬的售價，啱唔啱Feel先？

售價：$848,000

直六引擎爆370hp馬力

擁有強勁性能的M2 Coupe，可說是對上世紀兩大雙門經典跑車E30 M3及BMW 2002 Turbo的致敬，最新研發的3.0公升直六BMW M TwinPower Turbo引擎可爆出370匹馬力，實力不能小覷！早前，M2 Coupe在紐布寧北賽道更做出7分58秒的圈速，僅慢於560匹的F10 M5 3秒，今年更成為MotoGP的官方安全車，性能唔使懷疑喇啩？若問我甚麼人適合買M2 Coupe，相信鍾意「玩車」的人都會喜歡，M2 Coupe的操控及穩定性都超強，一般有番幾年牌齡都駕馭得來，唔使話要上過乜Course物Course先揸得掂。不過，後座空間就認真麻麻，懸掛調校亦偏向運動化，長時間屈喺後排並唔太好過，經常都會多於兩人出行，乖乖地，唔好諗M2 Coupe喇，Budget唔想大變、個樣又要跑跑哋，435i Coupe或Gran Coupe可能啱你啲，起碼唔會被外母黑臉先啦！

多功能軚環用上M出品，後方還設有加減波撥片。

引擎可輸出370匹強勁馬力，4.3秒便可完成0~100km/h。

排氣喉以左右四出設計，跑味甚濃。

加入MDM可玩飄移

M2 Coupe適唔適合作為代步車呢？我覺得係絕對無問題嘅，話就話懸掛較標準版硬，但又未至於會戥到五臟六腑調晒位嗰種，整體濾震算做得不錯，好舒適就稱不上，但坐前座完全在可接受範圍。M2 Coupe是一款設計來畀你玩、着重操控樂趣的轎跑車，後座乘客的感受並非考慮重點，買得呢類車少少自私都要喇，唔係買嚟做乜？為提升操控性能及彎路極限，廠方特別為M2 Coupe配置後軸主動式差速器（Active M Differential），系統可視乎實際情況將鎖合效果在0至100%之間進行調節，藉着控制左右車輪轉速來增加行車時的牽引力，即使以頗高的速度入彎依然貼服，總是有大把貨在手似的，快得來又穩陣。想玩得放啲？得！配備的DSC還加入了M Dynamic Mode（MDM）選項，系統啟動後會容許輪胎有較大程度的打滑，甚至做出飄移動作，若非技術精湛，那就不要胡亂嘗試了。

喇叭用上Harman Kardon出品，用料夠晒豪氣。

後座空間只是一般，長途旅程會較攰。

前座配上一對跑車椅，並附設電動調校。

皮革跑櫈包裹力強

外觀上，M2 Coupe甚有M家族的影子，極具跑格的車身包圍配合19吋大軨及M徽章，加上M系車款的專屬車色Long Beach Blue Metallic，輕易便可分辨出高性能身份。車廂設計亦符合人體工學，前座的Dakota皮革跑櫈不但提供舒適的乘坐感，兩側包裹性亦非常足夠，在山路上點轟、點劈都可以穩住身軀。現時，代理開出的售價為$848,000，設備都幾齊吓，Comfort Access、Harman Kardon音響、天窗及19吋M輕合金輪圈全部落齊，收得你錢都畀番咁上下嘢你，雖未至於平，但買得M，唔係咁計較呀？另一方面，BMW HK還為M3及M4引進專屬的Competition Package，馬力由原來的431匹增加至450匹，並改配20吋軨、黑色高光澤鬼面罩及排氣尾管，性能及賣相都更勝一籌。