初夏登場ZAYAK浮潛板瞓身玩

天氣又熱又悶，與其屈喺冷氣房向炎夏投降，不如換上泳衣，衝去海灘大玩特玩。位於南丫島嘅西沙水上活動中心出晒名玩水，今年佢哋引入咗全新嘅ZAYAK浮潛板，瞓喺板上即可欣賞到美絕海底世界；加埋馬利寶水上樂園同衝關大挑戰等大型水上設施，一靜一動，齊齊投奔初夏！

玩ZAYAK浮潛板毋須把臉浸於水中，讓不諳水性的玩家也能體驗浮潛樂趣。

私人「玻璃船」

新登場嘅ZAYAK浮潛板由美國引入，以模製聚乙烯生產，尺寸為48×24×8吋，豎立起來有半個人咁高。雖然重量接近18磅，但浮力驚人，放喺水上依然能操控自如。外形上它跟一般浮板分別不大，特色係板前設有手挽，板底特設透明玻璃，玩家只需探頭到板身的橡膠頭套，就能欣賞到海底世界。西沙水上活動中心經理Otto Yeung表示：「傳統浮潛要戴上浮潛鏡和吸管，不過好多人唔識用或者戴得唔舒服，而且有衞生問題。ZAYAK浮潛板最高負重220磅，毋須潛鏡和吸管，臉都唔使濕就可享受浮潛樂趣！」難怪連唔識游水嘅模特兒Seacole都夠膽玩，玩完仲冇溶妝，Keep住靚樣！

ZAYAK浮潛板設計符合人體工學，並特設手挽及阻光橡膠頭套。

底部設有透明玻璃，水底視野超過90度。

最高負重220磅，大隻佬都玩得到。

ZAYAK浮潛板能夠隨海漂浮，輕鬆欣賞到海底世界。

試玩報告

好玩指數：★★★（5★為最高）

危險指數：★

收費：$300/2小時

親子水上樂園

中心今年把以往泳池專用嘅馬利寶水上樂園帶到海灘，它由美國Aquaglide開發，以PVC物料製造，最多可供8人一齊玩，過癮之處是它把直徑12呎嘅八角形彈床、小型滑梯、浮橋及水池結合，玩家既可在彈床上跳躍，又可在滑梯任意滑落水，玩得攰再走到水池休息兼曬日光浴，一個Game帶來多重樂趣。

試玩報告

好玩指數：★★★★

危險指數：★★

收費：$400/30分鐘

瘋狂障礙賽

障礙賽真人Show《橫「沖」直撞》喺美國勁受歡迎，雖然香港冇得玩，但中心新引入嘅衝關大挑戰，好玩程度絕對唔輸蝕！它由多個大型吹氣設施組成，玩家先要橫越水上跨欄內的兩個淺水區，再捐過金字塔形遊戲站，然後走過10呎水上跑道，最後爬上5呎高滑梯為之完成，既考平衡力又考膽量。而且計時比賽以外，各位仲可以不停騷擾對手。Otto教路，跨欄及跑道濕咗水後都幾滑，企喺度玩甚難平衡，唔想變落湯雞就最好以手代足爬過去！

馬利寶水上樂園由八角形彈床、小型滑梯、浮橋及水池組成。	彈床足有12呎闊，彈力超強，睇吓邊個彈得最高！	金字塔形遊戲站可任意攀爬，但想快想安全就建議捐過去。
衝關大挑戰由多個大型吹氣設施組成。	西沙水上活動中心經理Otto Yeung指出，玩家玩時需要穿上救生衣，以策安全。