宅男女神實試！SelfieCity呃Like玩本土

香港主題Filter

今時今日用手機影相，燈光、構圖統統唔重要，最緊要識玩濾鏡（Filter），為平凡相片加入特別效果，因此主打城市濾鏡嘅《SelfieCity》上架後大受歡迎。最近除咗原有嘅紐約、東京、巴黎、台灣等城市濾鏡外，終於加入埋香港，推出名為「香港映像」嘅濾鏡，色調靈感取材自香港獨特景觀及本地文化特色，當中包括「旺角霓虹」、「中環碼頭」、「離島足跡」、「蘭桂坊」、「太平山下」、「藍屋」及「花樣年華」7款濾鏡，甚至可為Live Photos動態相加Filter，玩法過癮。

實測勁有Feel

小記約埋宅男女神Vivi到中環測試新Filter，使用「中環碼頭」濾鏡後影像帶出淡淡水氣，相片呈淡灰色Cool到爆！而「離島足跡」濾鏡參考電影《春光乍洩》的色調，飽和度高令五官更突出。同樣向電影借鏡的有「花樣年華」濾鏡，模仿50年代電影，用色極富復古感覺。玩色嘅仲有「藍屋」，藍紫色略帶詭譎氛圍，營造氣氛一流！入夜後必玩有「蘭桂坊」及「旺角霓虹」，前者以疊影模仿醉酒迷幻效果；後者則透過三色濾鏡營造五光十色的霓虹燈效果。而Vivi最Like嘅濾鏡係「太平山下」，佢話將維港景色重曝入相片內，成張海報咁勁有Feel！

「太平山下」將維港景色重曝到相片內，背景愈清愈深色，效果愈明顯。	「藍屋」呈現舊電影的淡藍紫色，氛圍詭譎，影窄巷一流！	「旺角霓虹」帶紫藍色眩光效果，提升靡爛感。
「蘭桂坊」以疊相模仿暈眩效果，配合拼圖功能勁有Feel！	「花樣年華」模仿50年代電影，用色充滿Vintage感覺。	「中環碼頭」相片呈淡灰透明，色調偏冷，帶有水氣感覺。
「離島足跡」參考了《春光乍洩》的色調，飽和度較高。

同場加映

美圖雖說是修圖鼻祖，其實不少廠商都有推出美顏、拼貼等Apps，玩盡執相和特效，以下介紹兩款畀大家。

日系拼圖《cameran collage》 主打日系雜誌風格的拼圖App，素材由Mercury Duo、Afternoon Tea、maste等品牌提供，主打Hi-Fashion及可愛路線，絲打必Like！ 售價：免費 （iOS、Android）

瞬間變高《百度魔圖》 被譽為功能最齊全的美顏App，除了瘦臉、美膚、彩妝等基本功能，還支援增高及豐胸功能，瞬間變成九頭身美女，難怪咁受女士歡迎。 售價：免費 （iOS、Android）

撰文：陳志滔

攝影：郭凱敏