SH-02H應節戲水GR靚鏡攝龍舟

下星期就到端午節，除咗可以食到各式嘅糉之外，應節活動當然離不開睇龍舟和游龍舟水！游龍「戲水」首要換番部防水嘅手機先至安心，剛由日本水路抵港嘅AQUOS Compact SH-02H，不僅支援IPX8防水標準，仲有GR認證嘅1,310萬像素鏡頭，帶埋佢去影龍舟健兒或者喺沙灘自拍都冇難度！

SH-02H支援IPX8防水標準，1.5米水深下可正常操作30分鐘，影龍舟都唔怕整濕部機。售價：$4,480

夏日配色

SH-02H可以話係早前Sharp推出嘅SH-01H「細佬」，皆因屏幕由5.3吋縮細至4.7吋，機身細部得多，袋落褲袋都唔會頂住；配合66mm闊度及弧邊機身，單手篤芒好輕鬆。此外，機身特別改用雙色設計，分別有藍×黑及黃×銀色選擇，小記較喜歡後者，黃色邊框配以銀色機背，配色醒神啱晒夏天使用。

貼心功能

日系手機經常會有意想不到嘅貼心位，例如SH-02H附送兩張專用機背貼，分別有黃色數碼格仔紋及Bubble圓形圖案，兼具防刮花和裝飾功能。驟眼睇平平無奇嘅機底仲玩埋燈光效果，來電、充電及手機解除鎖定嘅情況都會着燈提示。講實用要數Grip Magic功能，用家只要用力握緊機身兩側，即可啟動指定功能，包括於熄芒狀態下開啟屏幕、將來電鈴聲音量立即收細、暫停屏幕旋轉等，夠晒窩心！

採用4.7吋全高清IGZO屏幕，留意500萬像素前鏡頭位於機面下方。

大玩雙色設計，提供藍×黑及黃×銀兩色選擇。

機底加入LED燈，燈光提示效果實用又有型。

高階硬件

鏡頭係新機一大賣點，雖然1,310萬像素喺數字上唔算吸引，但換上高質鏡頭模組、新影像處理器、光學防手震技術，仲有由Ricoh發出嘅GR認證，拍攝質素有保證。小記試拍龍舟時，除咗可選擇自動、手動、高速拍攝、縮時攝影等模式，仲支援4K攝錄，基本功能齊晒，就算拍攝龍舟比賽嘅動感影像都冇問題；而且成像細緻度高，顏色自然。硬件方面，用上Snapdragon 808六核心處理器、3GB RAM嘅高階規格，扣分位係僅得16GB ROM，需要插microSD卡擴充容量。

打開機側保護蓋可更換nanoSIM卡及microSD卡。	備有無蓋式microUSB防水插口，唔使開蓋充電。	附有兩款專用機背貼，圖案都幾靚。
採用Snapdragon 808六核心處理器，Benchmark獲得46,444分。	內置計步器軟件，可計算用家行走步數、距離、卡路里消耗。	備有「Self Check」功能，出現疑似壞機情況時可以自我檢查。