怪獸Pizza水上飄夏日泡泡樂

未到6月已經日日接近攝氏三十度高溫，唔怪得每逢周末喺西貢碼頭總是逼滿開船P嘅後生仔女。近排有班90後搞咗檔GOFLOATHK，喺外國引入多款船P必備嘅大型水泡（Pool Float），由怪獸、冬甩到Pizza款式都有，幾百元一個Package就可租到多款巨型水泡嚟玩，今個夏天想喺船P博Like靠晒佢哋！

彩虹獨角獸水泡款式相當受歡迎，今個夏天必玩！

Pool Float外國Hit爆

香港嘅船P主要玩滑水、潛水等，水泡、浮床等靜態玩意向來用嚟陪襯居多，款式相對較少。外國對於水泡嘅款式和要求大得多，不少人愛喺自己嘅私人泳池搞派對，而呢類Pool Float大型水泡應運而生。GOFLOATHK負責人David表示：「美國著名Pool Float品牌如Swimline、Intex等，均採用高密度塑料製作，耐用性和承托力佳，好似大班椅造型連小物收納位置的Pool Lounger、雙人蹺蹺板Sea-saw Rocker Pool Toy等，今次率先引入造型有趣嘅怪獸及食物款式，以迎合年輕人喜好。」

包充氣一條龍

各位可能即時想網購Pool Float水泡嚟香港玩，但David認為唔划算：「一個特色水泡最平都要幾百元，大型浮床可能上千元，畀你買番嚟玩幾次，Upload完靚相上網博Like，到下次再重複使用就Out晒。」因此GOFLOATHK強調水泡只租不賣，套餐最平$550已可租到6款Pool Float水泡玩成日，仲可Mix & Match包保唔會悶。「當中最高人氣係彩虹獨角獸和金色天鵝，女仔騎上去勁吸睛！另推介大型冬甩水泡、可供2人玩嘅Pizza造型水泡。」不過有咁多水泡，充氣始終費時失事，所以佢哋包埋機泵充氣服務，喺碼頭交收方便上船即玩，仲提供埋手動泵以備不時之需。

外國的浮床會有太陽擋的半帳篷款式，可容納4人使用，香港暫時未有引入。	冬甩水泡凹左一忽，Model見到都想咬一啖！	金色天鵝夠晒闊落，騎上去相當穩陣。
Pretzel水泡可以同時畀兩三個女仔玩。	兩塊Pizza可綁埋一齊變身大型浮床。	紅鶴水泡夠浮誇，Model都Like爆。

邊度玩最Fit 甕缸灣人煙少

帶住咁大隻水泡去清水灣等熱門沙灘玩肯定逼爆，撞親其他泳客就冇癮，因此船P到較少人嘅沙灘或淺水區更為適合，位處萬宜水庫附近嘅南風灣屬不錯選擇，事關此處離西貢碼頭較近，往返船程慳番唔少時間。如想搵人煙稀少嘅沙灘喪玩，建議到牛尾海沙塘口山的甕缸灣，其淺灘水域水深約5~10米，海面平靜適合玩各式水上活動，還可躺在浮床曬太陽，遠眺火石洲島嶼景致，風光宜人。