上海Canon EXPO直擊！MR混合實境未來任你摸

摸得到的虛擬影像

近期VR虛擬實境大熱，無論打機、睇片都有不少Gadgets面世，之不過VR技術睇到摸唔到，故Canon特別設置了一個MR混合實境展區，擺放了一架道具汽車，小記起初見到一班人戴住眼罩好似「耍盲雞」咁摸嚟摸去，但當親身戴上頂部有多支天線嘅特製眼罩後，頓時清楚見到虛擬汽車嘅外殼與內籠，唔單止可以打開車門，仲可以真實咁坐上去摸吓軚盤，感覺好逼真。

玩家可因應喜好，轉換車身顏色和胎軨款式，甚至連四周環境都可切換，相信未來揀車或買車時都用得着，比VR技術嘅互動性高好多。

雖然Mreal HH-A1眼罩能夠在實境上顯示虛擬影像，但需要拖住條線。	從屏幕可見到虛擬汽車嘅畫面，可因應使用者喜好而換上不同車身顏色。	只要手持特製眼罩配合座椅和耳筒，便能360度VR欣賞虛擬音樂表演。

投影加手勢揀衫

除咗視覺體驗，另有以動作操控嘅投射科技，好似利用投影技術打造嘅服飾展區，用家做出唔同手勢，即可切換衣服顏色和款式，例如在畫面前用手一掃便可換Fashion Style、拍一拍會彈出Menu選項等。而類似嘅技術亦應用喺未來相簿，場內嘅天花板設置咗投影機和感應器，玩家可用手自由操控投射出來嘅相片和影片，更可配合道具相薄、相架一齊玩，令投射影像嘅真實感倍增。

利用投影技術可於模型上投射出不同服飾設計，再以手勢幫件衫換款換色。	未來相簿會把相片和影片投射到枱面，透過感應器仲可配合相架一齊玩。	呢個Snapshot展區可以畀大家自拍，透過鏡面反射可影到自己好似企喺大廈邊緣！

1.2億像素單反現身

未來科技嘅感覺有少少離地，其實Canon EXPO入面都有好多貼身嘅技術，例如展出了1.2億像素單反嘅概念機，外形似足EOS 5D系列，但暫時仲未有型號，所拍出來嘅影像喺電腦睇，就算放大100%都冇出現鋸齒紋，畫質細緻順滑，唔怪得話可以打印B0尺寸嘅超巨型相片。講起打印，場內特設一個由200張5,000萬像素相片打印出來嘅機場，小記遠睇時似足真實環境，站喺指定位置仲可看到最佳效果。

1.2億像素單反相機概念機，型號位置印上「EOS」字樣。	1.2億像素單反唔單止得個樣，真係有拍攝示範，從屏幕可見其成像細緻清晰。	呢個由200張5,000萬像素相片合併並打印出來嘅機場，真實感爆燈。

放大鏡睇8K顯示屏

雖然現時4K大行其道，但廠方嘅技術已達到8K層次，尤其是自家開發嘅8K屏幕，細緻度甚至可以用放大鏡去「聞相」，相內嘅一磚一瓦、人物細節都睇得清清楚楚，而且飽和度和對比度相當高。除咗相片之外，現場仲可欣賞到8K影像，皆因廠方特別以8K攝錄機拍片，並由4部4K投影機4K500ST投射出「8K之旅」，讓入場人士能夠親身體驗8K畫質，小記置身其中發覺3個巨幕組成嘅畫面不斷移動，感覺好似坐緊車身歷其境一樣，真實感爆燈。

「8K之旅」由4部4K投影機4K500ST投射畫面，再由3個巨幕構成逼真影像。	廠方自家研發嘅8K顯示屏，準備埋放大鏡畀各位「聞相」，夠晒貼心。	場內有體操選手表演，讓各位試吓EOS-1D X Mark II機王嘅連拍威力。

特派記者：黎子豪　

鳴謝：Canon