東京實測5吋Xperia X Performance神速追焦

2016年各大廠商嘅旗艦手機早已出爐，偏偏日系代表Sony未見影蹤，確實令一眾粉絲等到頸都長。近日終於有好消息畀大家，新機王Xperia X系列繼日本開放預售後，香港亦將於6月正式開賣。小記日前走訪Sony東京總部，搶先試玩頂級型號Xperia X Performance，其2,300萬像素G鏡頭支援0.6秒啟動拍攝，仲植入同門α相機嘅預測追焦功能，一篤屏幕即自動Lock實主體，去涉谷、原宿等潮人勝地Snapshot冇甩拖！

Xperia X Performance強化拍攝功能，植入2,300萬像素鏡頭。

底面同色新設計

以往提起Sony旗艦手機，一定會聯想到Xperia Z系列，廠方今年破格以Xperia X系列擔大旗，並分為Xperia X Performance、Xperia X及Xperia XA 3個型號。當中頂級嘅Xperia X Performance外形與前作Xperia Z5相似，但屏幕尺寸由5.2吋縮細至5吋，並換上2.5D弧面玻璃，加上圓渾機側，邊位更順滑好揸手。

另一分別係全新Unified Design，機面機背均用上同一色調，配合石墨黑、白、香檳金及玫瑰金4色，日系感覺更突出；前兩者配色的機背加入髮絲紋理，金屬感更重，後兩者用色偏向柔和，在不同光線下呈現嘅顏色略有不同，男女合用。此外，新機支援IP65/IP68防水防塵標準，並且配置無蓋式USB插口，就算橫風橫雨都唔怕整濕部手機。

Xperia X Performance旗艦型號用上5吋全高清屏幕。售價：待定

在涉谷街頭抓拍時，舉機一按快門，不消1秒便成功捕捉影像。

預先開啟「物件追蹤」對主體進行預測追焦，無論表演者怎樣移動都可Lock實主體。

0.6秒啟動兼拍攝

今期各大機王都換上Qualcomm Snapdragon 820處理器及3GB RAM，Xperia X Performance當然跟足，拍攝功能仲有驚喜，2,300萬像素主鏡頭的快速啟動功能再度加強，官方表示可做到0.6秒啟動兼拍攝，小記喺涉谷實試時，發覺喺熄芒狀態下一按實體快門鍵，真係唔使1秒就能啟動鏡頭並拍攝，全面簡化開機、進入介面、對焦等步驟，用嚟街頭抓拍一流。實用性更有驚喜嘅預測追焦功能（Predictive Hybrid AF），鏡頭可預測物件動態並進行追焦，小記欣賞日本傳統歌舞時，篤芒揀表演者後畫面會自動以黃色框框追實目標，輕鬆成功追焦。而前置1,300萬像素鏡頭則加強夜攝效能，喺超低光環境下自拍依然成像實淨，加埋自然嘅柔膚效果，Selfie掟上面書冇得輸！

加入預測追焦功能，點選主體後會以黃色框顯示追蹤主體。	支援雙卡雙待，惟SIM 2需與microSD共用卡槽，不可同時擺放。	前置鏡頭達1,300萬像素，自拍效果比唔少旗艦機出色。
測試區在同一低光環境下自拍，Xperia Z5（右）的成像明顯比Xperia X Performance鬆散，可見新機成像質素有大進步。

孖生作Xperia X

雖然Xperia X Performance未有定價，但齋睇規格都估到唔會好平，若各位對效能冇乜高要求的話，可考慮佢嘅孖生細佬Xperia X，同樣備有4款配色選擇，唯一唔同係石墨黑、白兩色嘅機背冇髮絲紋。事實上Xperia X機身更薄更輕，相信是因為抽走了防水防塵功能，而且改用效能較平均嘅Qualcomm Snapdragon 650處理器。此機還用上與Xperia X Performance同級的前後置鏡頭、指紋辨識器等硬件，功能絕對唔輸蝕！另一成員Xperia XA走中低階路線，同樣備有5吋屏幕，但換上窄邊框機身，配色與其他兩機相同，不過因為物料唔同，顏色反而更突出。規格方面，MediaTek Helio P10處理器、2GB RAM、720p屏幕屬入門級數，幸好搭載1,300萬像素主鏡頭，應可吸引到學生哥入手。