HiRM獵魔高達勝在夠骨氣

PG級數精密骨架

雖然Bandai去年已出咗HG（High Grade）嘅1:144及1:100獵魔高達模型，不過要數王道之選，一定係最新上架嘅HiRM，皆因《鐵血的孤兒》機設中，強調72部高達之所以凌駕其他機動戰士，在於其獨有嘅ASW-G骨架，HiRM不僅全套骨架以完成品形態展示，做工仲相當精細，似足縮水版嘅PG（Perfect Grade）模型，尤其係腰腹、手肘、大腿，以至小腿連接足踝嘅油壓管都有連動伸縮機關；另一方面，膊頭、髖位及足踝等受力關節都用咗金屬組件，令骨架更具分量。美中不足係膝頭嘅金屬組件只屬外層裝飾，內部嘅雙關節只以塑膠製成，要穩陣地擺出單膝跪甫士並不容易。

成盒模型嘅精粹就係呢副骨架完成品，精密度足以媲美Perfect Grade。	隨盒只有滑膛炮（左）與太刀（右）兩件武器，反而粉絲最想要嘅錘矛就冇咗影。	多個受力關節都用咗金屬組件，惟膝蓋嘅金屬只用於外層，可惜！

裝甲武器落差大

HiRM獵魔高達係介乎完成品與模型之間嘅產品，皆因裝甲與武器要玩家自行剪件組裝。裝甲方面，除咗100%用上分色處理，毋須玩家自行上色，配色仲比兩款HG更具特色，如白色部分加入純白與淺灰來增加層次感，純白Parts仲噴咗珍珠白色，藍、紅、金等色件則噴咗金屬色，加埋透明紅Parts嘅底部預先上咗銀色，令HiRM版增添了一種超然嘅貴氣。

骨架本身有好大嘅活動能力，不過裝晒外甲後可動幅度會打折扣。	骨架身上好多油壓管都有連動伸縮功能，絕非徒具虛形。	頭部分件嘅仔細度算得上係近期嘅代表作，不過雙眼位置有點被天線遮咗。

不過武器方面只得滑膛炮與太刀，反而動畫中出場更多嘅錘矛竟然冇咗，以一盒賣16,000日圓嘅高價模型嚟講，有啲講唔通囉！兩件武器嘅做工亦比唔上骨架與裝甲，滑膛炮只屬傳統左右件組裝，瞄準器仲懶到用貼紙；太刀雖然用上黑鐵色，但光澤感不足，膠味極濃，需要再花時間自行打磨噴油。咁到底HiRM值唔值得入手？小記覺得淨係副骨架已值回票價。

透明紅組件嘅底部，事先已上咗銀色底油，抵讚！

背包內藏伸縮關節，可以打開來連接滑膛炮。

撰文︰單富良　

攝影︰張錦昌、蔡浩文　

查詢電話︰2433 1828