1吋感光元件機仔攝力戰

近期兩個免費電視台嘅旅遊節目引起全城熱話，搞到機Gor忍唔住Book晒機票酒店走番轉，最頭痕莫過於帶咩相機，以往機Gor都會帶單反或者無反相機，不過依家啲機仔又細部、影相又靚，最近仲新返咗兩部用1吋感光元件嘅Canon PowerShot G7 X Mark II及Panasonic Lumix ZS110便攜機，咁就一於喺香港試吓影風景，再考慮帶邊部出發啦。
（左）配備F1.8大光圈鏡頭，可將操作環切換為逐級或連續操作，設計相當貼心。Canon PowerShot G7 X Mark II 售價：$4,980（a）<br>（右）用上一支25~250mm鏡頭，而操作環提供連續操作。Panasonic Lumix ZS110 售價：$6,190（b）
（左）配備F1.8大光圈鏡頭，可將操作環切換為逐級或連續操作，設計相當貼心。Canon PowerShot G7 X Mark II 售價：$4,980（a）
（右）用上一支25~250mm鏡頭，而操作環提供連續操作。Panasonic Lumix ZS110 售價：$6,190（b）

低光自拍利器 Canon PowerShot G7 X Mark II

講到用上1吋感光元件嘅DC機仔，PowerShot系列嘅陣容好「齊腳」，有25倍變焦能力嘅G3 X、操作至上並提供多個轉盤嘅G5 X、主打超輕便嘅卡片機G9 X，而今次嘅主角就係G7 X Mark II，規格屬於中階，而且有反芒設計方便自拍，繼承上代嘅血統。G7 X Mark II亦都係第一部內置全新DIGIC 7數碼影像處理器嘅相機，配合F1.8大光圈鏡頭，應付低光環境綽綽有餘。

機頂用上雙層轉盤，分別調校曝光補償和拍攝模式。
  • 機頂用上雙層轉盤，分別調校曝光補償和拍攝模式。

規格表

感光元件：2,010萬像素CMOS

頂部兩個為操作轉盤，以及模式轉盤。
  • 頂部兩個為操作轉盤，以及模式轉盤。

焦距：24~100mm

光圈：F1.8~F2.8

屏幕：3吋104萬像素

感光度：ISO 125~12,800

體積：105.5×60.9×42mm

重量：294g（淨機身）

4K動靜皆宜 Panasonic Lumix ZS110

至於Panasonic都有幾部用緊1吋感光元件嘅DC機仔，包括支援16倍光學變焦嘅FZ1000長炮機，外形似手機兼行Android系統嘅CM1機仔，仲有全新嘅Lumix ZS110便攜機。ZS110唔單止有全黑和銀黑兩種機身顏色揀，而且用上一支10倍變焦嘅Leica鏡頭，影出嚟唔知有冇真正「奶」味，至少光學質素都叫做有保證，再加上有得拍埋4K影片，亦都提供4K相片模式，能夠從4K片中擷取800萬像素影像。

規格表

感光元件：2,010萬像素MOS

焦距：25~250mm

光圈：F2.8~F5.9

屏幕：3吋104萬像素

感光度：ISO 80~25,600

體積：110.5×64.5×44.3mm

重量：268g（淨機身）

第1回合：鬥影相拍片

兩部機唔單止感光元件尺寸一樣，就連像素都冇分別，而G7 X Mark II畫質細緻且銳利度高，影出嚟嘅畫面富有層次感，加上有F1.8大光圈加持，保持一定快門速度，就算天陰陰都唔怕手震。至於ZS110畫質勝在飽和度夠高，展現出鮮艷嘅色彩，縱使相機唔係以大光圈作賣點，但係10倍變焦去旅行Snap真係好夠用。縱使影相難分難解，但拍片方面就高下立見，事關ZS110支援4K@25p畫質，比起G7 X Mark II只有1080@50p質素，前者明顯高一班。

G7 X Mark II影風景嘅銳利度高之餘，線條又實淨，連欄柵嘅細節都睇得到。
  • G7 X Mark II影風景嘅銳利度高之餘，線條又實淨，連欄柵嘅細節都睇得到。
G7 X Mark II拍片提供1080@50p，其實放上網已經好夠用。
  • G7 X Mark II拍片提供1080@50p，其實放上網已經好夠用。
10倍變焦鏡頭夠彈性，連遠處嘅細字都睇得清清楚楚，而且顏色表現夠斑斕。
  • 10倍變焦鏡頭夠彈性，連遠處嘅細字都睇得清清楚楚，而且顏色表現夠斑斕。
ZS110具備4K@25p拍片畫質，而且擁有100Mbps傳輸率，細緻程度可見一斑。
  • ZS110具備4K@25p拍片畫質，而且擁有100Mbps傳輸率，細緻程度可見一斑。

第2回合：鬥取景便利

畢竟機Gor唔係新手，唔會淨係企定定Eye Level影相，所以G7 X Mark II翻揭式屏幕真係幾方便，唔單止可以180度向上翻大玩自拍，亦能夠45度向下翻，啱晒機Gor經常擒高擒低取景，甚至篤芒影相都做到。雖然ZS110同樣配置3吋篤芒設計，不過就冇得揭來揭去，好彩佢都有個電子觀景器，可以喺猛烈陽光下取景，之但係得0.2吋實在太細，冇單反或無反個觀景器咁好用。

G7 X Mark II個芒可以180度向上翻，旅行自拍話咁易，而且亦方便唔同角度取景。
  • G7 X Mark II個芒可以180度向上翻，旅行自拍話咁易，而且亦方便唔同角度取景。
ZS110背面冇反芒，只有一個0.2吋116.6萬像素電子觀景器，用落冇咁爽。
  • ZS110背面冇反芒，只有一個0.2吋116.6萬像素電子觀景器，用落冇咁爽。

第3回合：鬥特異功能

雖然G7 X Mark II個樣同上代都好鬼似，不過都加咗少少新模式，好似「Pan鏡」的搖攝模式、用嚟自拍嘅自拍模式等，老老實實「Pan鏡」真係好少會用到，唯獨自拍模式裏面嘅平滑肌膚功能可以美肌，叫做有啲用。至於ZS110最好玩梗係Post Focus功能，能夠影完相後再揀番對焦點，尤其是影微距或者叫路人甲幫手影相，都唔怕對錯焦，雖然畫質只有約800萬像素，對新手嚟講幾實用。總之兩機嘅功能都咁實用，平手！

G7 X Mark II提供多種好玩模式，如搖攝、星空模式及自拍等，當中自拍模式嘅平滑肌膚功能有5級程度選擇，其實使用第3級已經好夠。
  • G7 X Mark II提供多種好玩模式，如搖攝、星空模式及自拍等，當中自拍模式嘅平滑肌膚功能有5級程度選擇，其實使用第3級已經好夠。
ZS110內置了Post Focus功能選項，結合咗DFD和4K技術，可以先影相後對焦，影相時會掃晒咁多個對焦點，而且唔係用軟件合成。
  • ZS110內置了Post Focus功能選項，結合咗DFD和4K技術，可以先影相後對焦，影相時會掃晒咁多個對焦點，而且唔係用軟件合成。

機Gor Report：G7 X Mark II務實夠貼身

向來走務實路線嘅Canon，甚少以噱頭或奇招作招徠，而G7 X Mark II雖然冇咩大驚喜，不過小改動、新功能都係貼近用家實際需要，例如星空拍攝、縮時攝影、Pan鏡呢類進階拍攝技術，都變得簡易化，新手撳個掣就影得到，加上又有美肌功能，無疑增加拍攝樂趣。ZS110「先對焦、後影相」嘅破格技術衝出傳統框框，而且又可以拍到4K，以一部機仔嚟講係幾勁，不過機Gor去旅行都係影相多過拍片。

旅遊攝影達人Richard
  • 旅遊攝影達人Richard

旅遊攝影達人Richard：「視乎目的去揀機。」

「其實揀機仔就好似揀咩鏡頭去旅行一樣，睇你去旅行嘅季節同目的，例如去影櫻花、紅葉主題就應該揀擁有長焦距嘅機仔，若然只係為咗影到此一遊嘅自拍相，就當然要揀有反芒嘅機。另外，有啲時候拍片比影相更容易表達事件，以便放上facebook或YouTube分享，所以拍片功能最基本都要有Full HD質素，假如有埋4K會更理想，始終4K係未來趨勢，短時間內都唔使換機。」

Profile

機Gor：機不離身，不信Spec只信測試，不扮高深，懶理低俗，貪新不忘舊。

撰文：機Gor 　

查詢電話：（a）3191 2333、（b）2833 0955