俄羅斯Irkutsk 130區好東西

其實這條標題全寫應是「俄羅斯好一個東西伯利亞（簡稱好東西）重城伊爾庫茨克市見聞錄」，伊爾庫茨克市（Irkutsk）被美名叫「東方巴黎」，理應都潮得下，不過山長水遠來到，型男美女？搵唔到；至潮街拍？似乎諗多咗；會唔會有平得過廣東道的名牌服飾？導遊話不如返莫斯科同聖彼得堡喇。平心而論，伊市有新有舊，由舊城跳升上潮區，殊不容易，最新的複合空間130區（Irkutsk 130 Quarter）是當地最出名的「樂土」，連City Tour都將130區列入參觀範圍，有甚麼好買？一齊睇過……

政府大樓（House of Soviets）外形木獨，看不出是教堂改建。

130區釋放自由

130區於2013年正式開幕，由32間18世紀的俄羅斯小土屋改建而成，內有餐廳、酒吧、戲院、博物館等，更有市內最大型商場Modnyi Kvartal。130區不定期舉辦不同類型活動，如花生騷、藝術展、節慶活動等，極受當地人歡迎。小木屋在1970年代開始一直被政府視為受保護歷史建築，可惜只有「視」，從未加以保護，也沒有修葺。直到2011年，伊市慶祝誕城350年的同時，政府終於決定將空置多年的房子改建，變成今日的130區。當地人稱這個重建計劃為「Irkutsk Sloboda」，後來此名也等同於130區，如你跟當地人說「Irkutsk Sloboda」，他們會明白你講緊130區。Sloboda同英文字Freedom有差不多意思，我大膽將這個計劃譯成「釋放伊爾庫茨克」。游走了伊城兩天，景點來來去去都是教堂、市集、紀念碑、革命廣場，即使是遊客都覺悶，何況是看了幾個世紀的當地人？這計劃要釋放的，也許不是那32間小屋，而是當地居民。

Modnyi Kvartal格局同港式商場差唔多，賣男女休閒服飾，頂樓是Foot Court及小童專區。

Modnyi Kvartal格局同港式商場差唔多，賣男女休閒服飾，頂樓是Foot Court及小童專區。

每次舉辦的活動也吸引不少人參觀。

改建後的130區如重獲新生。

商場每季亦會舉行名為「Start Fashion」的時裝展。

130區內其中一間餐廳Gorodskoi的裝飾，為一架戰時的蘇聯電單車。

有點土的心心鐵門，專為2月14日而設。

Pop Art風4個轆，有點巴西藝術家Romero Britto作品的影子。

逛超市最失禮

Modnyi Kvartal商場是130區的人氣之地，吸引不少當地人來Shopping同打躉，商場的Instagram有過萬人追蹤，多過沙田新城市廣場（寫稿時有2,419個追蹤者）。商場內80個不同類型的品牌中，除了adidas、H&M、Pandora等大牌，某些俄國本地品牌如Westland及Gloria Jeans感覺更有驚喜，不是想像中咁悶，前者走休閒路線，跟Esprit有點相似；後者為全俄羅斯最大的成衣生產商，有齊童裝、大人衫、睡衣、內衣褲等，即係俄版Cotton On喇。衫褲鞋襪唔啱買，地下的Supermarket應該是你杯茶，超過20種Vodka任揀，價錢HK$30起就有交易，必買推介是Baikal Ice Vodka，由貝加爾湖湖水製成，比Absolut Vodka易入口得多，亦不嗆鼻，幼滑度拍得住法國黃牌Vodka Grey Goose，但Grey Goose每支約要HK$360，Baikal Ice Vodka每支HK$60有找喎！我們一行多人在酒架前進行強國式掃貨，原味、榛子味、莓紅味的貝加爾湖Vodka被搶剩幾支，為人側目（利申：我買咗1支咋）。

有趣一買<br>Baikal Ice Vodka，RUB477（約HK$55），好抵玩。

有趣一買
Baikal Ice Vodka，RUB477（約HK$55），好抵玩。

史太林證件套，見到都要來個共產式敬禮，RUB500（約HK$57）。

包裝精美的幸運餅乾，RUB250（約HK$28）。

由牛肉製成的香腸，口感同臘腸有點似，RUB237（約HK$27）起。

各款魚類小食，味道極鹹，佐酒一流，RUB63（約HK$7）起。

Irkutsk 130 Quarter

地址：Zhelyabov Street, Irkutsk, Russia

商場營業時間：10:00am~10:00pm

混血教堂請快進

點悶都好，來到伊市都要上堂簡單的歷史課。歷時2小時、帶你參觀多個歷史建築的City Tour，印象最深刻的是主顯大教堂（Epiphany Cathedral），建於17世紀，為城中最古老的東正教教堂，白色牆身襯着金、綠、橙三色混搭，顏色已叫人眼前一亮，牆身更有不少聖人畫像。最特別是教堂最頂部雖然有大大小小的俄國傳統洋葱頭頂，但左面的平頂塔尖屬北俄羅斯建築，中間及右面的尖頂同圓頂則有少許巴洛克影子，又尖又圓的外貌令教堂看起來特別顯眼。教堂隨便進入但不准拍照，非教徒者如我，入去其實只是避吓嚴寒。除了主顯大教堂，市中心仲有30多個值得欣賞的歷史景點，算是了解伊城歷史的最佳入門。