Dark Souls III挑戰死神自虐之作

對於開發商而言，遊戲難度向來很難拿捏得好，但創作《Dark Souls》的From Software從來唔使考慮這問題，皆因系列作嘅特色就係「超難玩」！新一集《Dark Souls III》變本加厲，遊戲做到更黑暗，多幾條命都唔夠死；只係玩家又真係奇怪，愈自虐嘅遊戲佢哋愈Buy！

比《Bloodborne》去得更盡

《Dark Souls III》延續系列作的中世紀黑暗背景及魔法劍術戰鬥玩法。喜歡Action RPG嘅玩家，應該記得From Software上年出過另一款題材接近嘅遊戲《Bloodborne》，查實《Bloodborne》與《Dark Souls III》屬同期開發作品，只係開發小組覺得後者可以去得更盡，令玩家死得更徹底，所以才延至近日推出。

魔法系統較以往兩集作出若干改動，但無損出招時的震撼。

「傳令」職業的戰技是貫通突刺，適合鍾意用長槍和盾牌的玩家。

今集遊戲利用低光或霧氣去營造末日氣氛，畫質更靚。

新設計突出末日主題

雖然兩大遊戲系列嘅風格都偏向黑暗，但新作加入更多變化，如透過天色同氣候去突出末日主題，包括引入黃昏或者大霧等灰沉景象。不過地圖數量會比上集少，改為集中設計大面積嘅複雜版圖，用意係想玩家花更多時間去探索周圍嘅未知環境。魔法系統方面，新作一改以往兩集的魔法使用次數限制，改用MP計量表顯示，要靠魔法藥水補充；而每種職業用嘅武器都有各自特性，可透過MP去提升武器破壞效果或組合出特別招式。

前方的白影是網絡上同一地方冒險的玩家身影。

遊戲的敵人眾多，而且鍾意成群結隊出動，非常難應付。

遊戲設有網絡元素，可透過召喚其他玩家一同挑戰Boss。

難度高挑戰機迷

今集玩家需要花更多時間去思考角色發展及武器升級，運用不同戰術抗敵。不過點樣升級都好，要在充滿高難度挑戰嘅遊戲世界生存並唔容易，好似之前推出嘅試玩版中，無論在室內或戶外都要面對大量敵人伏擊，用盡道具以為捱過一波後，又要迎接另一波敵人進擊。開發小組還參考《The Lord of the Rings》中的神箭手Legolas，以超凡射箭速度加入敵人招式中，要全身而退非常困難。雖然愈玩得耐愈有自虐心態，但遊戲的魅力正在於此，今次還會於PS4及Xbox One平台加推繁體中文版，有心挑戰死神的Game迷必玩。