系出名門瀛Phone鬥驚喜

日系手機總會有新鮮感帶畀用家，除咗外形、配色與眾不同，有時連功能都耳目一新。機Gor近日喺先達同老友吹水，就發現咗兩部日本新返嘅大廠手機，分別係LG Fx0及Sharp AQUOS Xx2 mini，前者玩透明機身兼Firefox OS系統，外形破格；後者玩窄邊靚芒，仲植入GR認證鏡頭，一於拎兩部日系新貴比併，睇吓邊部最有驚喜！
Fx0售價：$2,880/左<br>Xx2 mini售價：$3,380/右
Fx0售價：$2,880/左
Xx2 mini售價：$3,380/右

LG Fx0開放系統

由韓廠LG炮製嘅Fx0，屬於日本電訊商au by KDDI專賣嘅混血瀛Phone，型號稱為LGL25，與早年大賣嘅LGL22、LGL24等同出一轍，由日本以水路運抵本港開賣。不過無論硬件及軟件都全面更新，用上透明金色機殼，可直接睇到電路板、電池、卡槽等組件，有點似當年Handspring PDA嘅懷舊感覺！原來透明殼係象徵Firefox OS嘅開放平台概念，又幾切合主題喎！

Sharp AQUOS Xx2 mini美型窄邊

喺日本手機市場歷史悠久嘅Sharp，近期最爆嘅消息肯定係被台灣鴻海正式入主，雖然暫時未知發展路向，但旗下手機業務好大機會革新，以望轉虧為盈。新抵港嘅AQUOS Xx2 mini屬其「大佬」AQUOS Xx2嘅細芒版，以4.7吋全高清屏幕提升便攜性，同時貫徹廠方設計風格，上、左、右均用上窄邊框，配以拋光效果嘅機身，充滿日系美型感覺。

Fx0的透明機背可睇到電路板、電池、卡槽等，新鮮感十足。
  • Fx0的透明機背可睇到電路板、電池、卡槽等，新鮮感十足。
Xx2 mini配備1,310萬像素Ricoh GR認證鏡頭，影相質素有保證。
  • Xx2 mini配備1,310萬像素Ricoh GR認證鏡頭，影相質素有保證。

第一回合：鬥屏幕畫質

兩機同樣採用4.7吋屏幕，不過解像度稍有分別，Fx0只有720p級數，相對Xx2 mini的1,920×1,080解像度，細緻度自然輸蝕咗啲。機Gor即場以《YouTube》 App試播串流影片，發覺Fx0因為系統所限，介面似足手機YouTube網頁版，僅可以HQ解像度播放；而Xx2 mini就冇上述問題，用Full HD畫質睇片都流暢自然。機Gor再以同一相片比較，睇相時發覺Xx2 mini無論亮度和飽和度都比對手出色，先贏一仗。

Fx0屏幕可視角度不俗，但因以HQ畫質播放，細緻度輸蝕咗啲。
  • Fx0屏幕可視角度不俗，但因以HQ畫質播放，細緻度輸蝕咗啲。
以全高清畫質播片，可見Xx2 mini的細緻度和色彩感較佳。
  • 以全高清畫質播片，可見Xx2 mini的細緻度和色彩感較佳。

第二回合：鬥系統操作

Fx0預載少見嘅Firefox OS 2.0系統，特點係以HTML5及JavaScript等網頁編碼開發，好處係介面冇咁大食，操作Apps時更爽快，而且功能較為簡化，將所有Icons放於主頁，惟部分Apps必須連接網絡才用得到，而自家《Marketplace》則提供一些離線Apps輔助；主頁頂部還加入一個搜尋欄，可輸入網址直接瀏覽網頁。至於Xx2 mini採用大家常見嘅Android 5.1作業系統，同其他Sharp手機一樣預載Feel Home介面，主頁以橫縱雙向操作，機Gor試玩時感覺爽手，還支援Mini Apps功能，可隨時以小視窗開啟地圖、影片播放器、相簿等功能。

Fx0提供多款Lock Screen，更可於鎖屏顯示即時新聞。
  • Fx0提供多款Lock Screen，更可於鎖屏顯示即時新聞。
系統及Apps以網頁編碼開發，所以遊戲介面亦較簡單。
  • 系統及Apps以網頁編碼開發，所以遊戲介面亦較簡單。
Xx2 mini備有Mini Apps功能，方便用家多工作業。
  • Xx2 mini備有Mini Apps功能，方便用家多工作業。
設有兩款介面，分別是Feel Home及傳統的Google Launcher。
  • 設有兩款介面，分別是Feel Home及傳統的Google Launcher。

第三回合：鬥特異功能

日系手機嘅硬件和系統有驚喜之外，軟件功能亦充滿特色。Fx0內置《Framin》，就算機Gor唔識進階編碼語言，只要跟住指示即可自製Apps，例如搖動手機時可轉換相片、點擊圖片播放指定音效等，雖然只係簡單效果，但可以過足DIY癮，設計完嘅Apps仲可分享給朋友，官網（網址：au-fx.kddi.com）更提供其他用家嘅作品，玩味十足。Xx2 mini則加入「Grip Magic」感應器，只要握緊機身兩側即可啟動相關功能，例如開啟屏幕、來電時將音量降低、暫停屏幕旋轉等，簡單又實用。

《Framin》可以自製個人Apps，過足DIY癮。
  • 《Framin》可以自製個人Apps，過足DIY癮。
「Grip Magic」握緊手機兩側即可啟動指定功能。
  • 「Grip Magic」握緊手機兩側即可啟動指定功能。
香港資訊科技商會榮譽會長方保僑
  • 香港資訊科技商會榮譽會長方保僑

香港資訊科技商會榮譽會長方保僑：「平台支援更重要！」

「Firefox OS開發商早前宣布停止開發系統及推出更新，意味愈來愈少軟件廠會投入參與Apps開發，程式和功能都難以追到其他平台。如用家只需要基本手機功能如通話、上網等，用Fx0等Firefox手機亦不會有太大影響；若然希望手機的軟件功能具擴充性，都係建議選擇Android手機喇！」

機Gor Report：Xx2 mini軟硬件成熟

機Gor玩咗兩部新機幾日，發覺Fx0無論介面、操作以至功能都好有新鮮感，仲充滿DIY味道，不過軟件支援上略有不足，例如不設《WhatsApp》等通訊工具，要靠《Loqui Instant Messenger》之類嘅App整合處理訊息，對於一眾貪新鮮嘅用家較為適合。而Xx2 mini軟硬件設計明顯較成熟，入門用家都可輕鬆掌握，加上外形美觀便攜性高，機Gor今次Buy佢多啲。

LG Fx0規格表

制式：GSM、WCDMA、LTE

處理器：Qualcomm Snapdragon 400四核心

記憶體：1.5GB RAM、16GB ROM、支援microSD

屏幕：4.7吋（1,280×720解像度）

鏡頭：（前置）210萬像素、（後置）800萬像素

對外連接：802.11n、藍芽3.0、microUSB

電池容量：2,370mAh

作業系統：Firefox OS 2.0

體積：139×70×10.5mm

重量：148g

Sharp AQUOS Xx2 mini規格表

制式：GSM、WCDMA、LTE

處理器：Qualcomm Snapdragon 808六核心

記憶體：3GB RAM、16GB ROM、支援microSD

屏幕：4.7吋（1,920×1,080解像度）

鏡頭：（前置）500萬像素、（後置）1,310萬像素

對外連接：802.11ac、藍芽4.1、microUSB

電池容量：2,810mAh

作業系統：Android 5.1

體積：126×66×8.9mm

重量：119g

Profile

機Gor：機不離身，不信Spec只信測試，不扮高深，懶理低俗，貪新不忘舊。

撰文：機Gor

查詢電話：2374 0618