Nissan GT-R終極戰神

全面進化壓軸登場

新版GT-R並非求其改啲嘢就推出來呃Like，實情有唔少嘢Upgrade咗，由內外觀、性能、舒適度以至科技設備都全面進化，而家入手GT-R會否太遲？不如咁諗，好嘢通常都係壓軸登場，好似保時捷Cayman GT4咁，咪又係轉個頭就賣晒，款尾又如何？2017年版GT-R的外觀變化並沒有翻天覆地，雖只換上新式的「V-motion」鬼面罩、頭冚及擾流套件，但並不代表廠方敷衍了事，不僅賣相看來更似Racecar，也提供了更佳的引擎冷卻作用及下壓力，使高速行車更加穩定，一切改動絕非虛有其表。

最大馬力565hp

新款GT-R搭配的3.8公升V6雙渦輪增壓引擎由手工大師親自打造，最大馬力提升至565hp/6,800rpm，較2016年款增加20hp，中、高轉表現最為顯著，同時改良了原來的六前速雙離合器波箱，轉波較以往更順及寧靜。此外，全新的排氣系統用上輕量鈦金屬物料製造，並加裝了「Active Sound Enhancement」系統，聲浪會變得更澎湃，但澎湃到哪個地步？未試過，呢刻答唔到，有機會試車再錄條聲畀大家聽。不過，Nissan話2017年款GT-R換上全新的吸音物料，而且導入「Active Noise Cancellation」技術，不論在任何車速，車廂都同樣寧靜，但咁是否好事就見仁見智。

放大圖片	軚環換上新樣式，並將加減波撥片整合其中。	輪圈換上新式設計，直徑達到20吋。

轉波撥片隨軚環轉

車廂布局亦經過重新設計，儀錶台用上高級的Nappa皮革包裹，錶板及介面都有所調整，而中控台的觸控式屏幕也由7吋升級至8吋，按鍵則由上代的27個減至11個，雖未至於煥然一新，但總算有新鮮感。另一方面，轉波撥片現整合於軚環上，撥片會跟隨軚環轉動，而不是像以往裝梗在軚環後方，就算扭軚多於90度，雙手仍可不離軚環轉波，操控當堂就晒手。一直以來，GT-R都被譽為世上其中一款操控最佳的速度機器，全新GT-R可謂更上一層樓，不但車架有更強剛性，還配上全新的高性能懸掛，無論穩定性及彎路極限都更勝一籌。擔心好快有新一代？計我話，你擔心唔夠人搶好過！

排氣系統用上輕量鈦金屬物料製造，聲浪較以往更澎湃。	中控台屏幕由7吋升級至8吋，按鍵也減至只有11個，更為簡潔。	六速波箱採用雙離合器設計，經改良後轉波更暢順及寧靜。

撰文：鄭浩文