汽車節目掣肘多

身為汽車版編輯，編者自然要落足眼力觀看。好睇？定唔好睇？不足一晚，就由首集睇到上星期播的第7集，各位冇睇錯，網上足本睇，真係眨眨眼就睇完，原本半小時的節目，網上版廣告少，一集只需廿分鐘。

問題呼之欲出了，一共有4個：

第1：半小時一集到喉不到肺，介紹的車輛難免蜻蜓點水。

第2：大眾化節目不應安排在晚上11時接近夜深時間播映。

第3：香港地少路窄，不如外國有場地可以極速試真章。

第4：受到廣管局條例監管，不能說出品牌或型號。

首兩條問題可由電視台改善，加強詳述及試車，以及加長節目時間。可惜尾兩條問題是絕症，要場地已難，要廣管局，即係叫政府修例，更加難！之後的節目都係呢部車、呢部跑車、呢部七人車……全部「單細胞複製車名」，外國的汽車節目不介意說出牌子及型號，部部車有名有份，有關部門參考吧！至於三色台今趟的節目已算不錯，睇得出製作認真，連極罕的限量版Pagani Huayra Dinastia都借到出來測試，至於主持人以輕鬆手法介紹車輛及藝人暢談駕車心得，並親身試車，都值得讚。

其實要徹底了解一部車，欣賞《汽車世界》特別號最適合不過，想睇更詳盡的試車片段，就要睇《東網生活》（on.cc）了。

撰文：朱志華