Fat Suit競技賽碰撞愛漏氣

近年香港多咗各式各樣嘅Party Games場地，不過玩嚟玩去都係泡泡足球、射箭Wargame等遊戲。 Bumperman遂將外國化妝派對流行嘅Fat Suit引入香港，並改良成肥仔衫競技賽，利用充氣服飾將玩家變晒做肥仔，碰碰撞撞咁打波攻城，癲起上嚟撞到件衫漏晒氣，攬埋一舊相當惹笑！

Fat Suit競技賽

源於特技化妝服飾

派對遊戲場地愈開愈多，但玩嘅嘢大多一式一樣，如何突圍而出？Bumperman活動總監Caspar表示：「去年暑假我嘅Partner喺網上留意到外國興起Fat Suit扮肥仔搞變裝派對，啲衫造型勁鬼馬，有相撲手、超人等，因此訂咗批衫嚟試玩。」Fat Suit本身源自拍戲嘅特技化妝，利用充氣皮膚令演員穿上去變成肥仔，美國處境喜劇《老友記》嘅肥妹造型Monica Geller就係咁扮出來，而用於遊戲當然不會這樣化妝，遂改為吹氣衣飾的肥仔衫。「現時Fat Suit以一件頭薄身布料縫製而成，腰部附近設有兩把強力風扇，透過遙控進行開關。玩家將Fat Suit穿上身並啟動裝置後，3分鐘左右便會吹到脹卜卜，電量大約夠玩3~4小時。」

「肥地奇」氣球爭奪戰

外國人玩Fat Suit大多用嚟影相，Bumperman卻加入各種競技活動，讓玩家變晒做肥仔玩餐飽，Caspar表示：「最受歡迎嘅3個遊戲係『肥地奇』、『炸彈人』和『飛碟攻城』，均以5分鐘為一節，5~7人隊際對賽，由於每節時間較短，所以各人一開波就埋身肉搏之餘，Book一次場可玩齊3個項目。」當中「肥地奇」嘅碰撞唔多，最啱用嚟熱身，其靈感來自《Harry Potter》嘅魁地奇，場地每邊各有3個呼拉圈龍門，玩家需利用手上嘅海綿條，將遍布地面嘅氣球打入對方龍門。Caspar畀貼士大家：「建議開波前先作分工，由1至2位玩家擔任攻擊手，其他隊友負責牽制對手，便能攻守兼備。」

Bumperman活動總監Caspar指出，Fat Suit引入香港幾個月，相當受歡迎。	現時供應的肥仔衫種類近20款，全部都可過頭笠穿上。	肥仔衫附有手提遙控開關，啟動後位於腰部的風扇會為服飾充氣。
Bumperman於觀塘工廈自設場地，如位於偉業街的室內場，適合5人隊際賽。	備有相撲手款式，爭奪時埋身碰撞，刺激之餘相當惹笑。	Model最鍾意呢件騎恐龍衫，貪佢上身較靈活。
胖公主款式的肥仔衫，Model着完身材勁豐滿呢！	Bumperman試過到大學舉辦肥仔運動會，學生變晒相撲手，要合力做出指定動作。

「飛碟攻城」埋身肉搏

着住Fat Suit梗係要碰撞先好玩，熱身過後便可進行「炸彈人」和「飛碟攻城」遊戲。Caspar指出：「『炸彈人』有啲似迷你版手球，各陣營會劃出禁區，裏面擺放3個雪糕筒，玩家要將手上嘅迷你籃球不斷傳畀隊友製造機會，最後在禁區外將球擲中雪糕筒得分。至於『飛碟攻城』將得分道具變成飛碟，雙方要像玩欖球般將飛碟套入對方雪糕筒達陣，由於玩家可以埋身攔截搶奪，因此碰撞場面經常發生。」值得留意，Fat Suit唔似泡泡足球咁碰撞後會彈開，服飾內只有空氣，無礙玩家手腳活動，衝撞時仲會漏氣走樣，但瞬間又恢復原狀，這些趣怪模樣是肥仔衫競技賽的過癮之處。