BMW X4 xDrive28iA一試鍾情

SUV一定是體積笨重、駕駛樂趣欠奉？其實唔一定，好似寶馬（BMW）X4咁，唔止賣相帶有Coupe影子，就連操控性能及拐彎表現都有板有眼，猶如駕駛升高了的轎跑車，好玩，兼且具備高度實用機能，令人一試愛上。

糅合SUV及Coupe特質

X4在BMW家族中十分年輕，推出還未夠2年，認識的人也不多。X4是甚麼車、定位又怎樣？要唔要大家一齊Google吓？其實，X4可說是小版X6，雖不是百分之百按比例縮小，但廠方同樣以運動型多功能轎跑車（SAC）定位，簡單地說就是一車結合SUV及Coupe的特質，跟X6同出一轍。X4話雖是SAC，車身高度低於X3、C柱設計又斜過傳統SUV，高個子坐進後座卻沒有頂頭頂腳的問題，當中竅妙是工程師開發X4時，特意將乘坐位置降低，好處不僅是提供更佳Headroom，更為貼地的乘坐位置也讓人有置身Coupe的感覺，進一步深化其運動形象。同時，後座可完全向前翻平，尾箱容量能夠由標準的500公升提升至1,400公升，擺放特大物品以至小型單車都得，另尾門設有電動開閂功能，實用性極高。

Sport+模式操控自主

今次測試的X4 xDrive28iA屬車系入門型號，電磁炮威力有幾強我唔清楚，但X4 xDrive28iA搭載的2.0公升直四BMW TwinPower Turbo引擎就可輸出245hp馬力，低至1,250rpm已可將350Nm的峰值扭力全數釋出，而且一直保持至4,800rpm，基本上已Cover晒最常用範圍，甫畀油已有澎湃的加速力，6.4秒便能夠完成0~100km/h。耗油量就中規中矩啦，廠方公布的綜合油耗為7.4L/100km，揸咗百六、七公里後（約有六成公路），用咗唔夠四分之一缸油（油缸容量為67公升），對馬力過二百匹的四驅SUV而言，都OK啦。預載的行車模式提供4個選項，分別為ECO PRO、Comfort、Sport及Sport+，節能與動態駕駛可輕易轉變，在Sport+模式下，引擎及波箱反應尤為靈敏，電子穩定系統的干預也會相對減少，喜愛動態駕駛及操控自主性更強的車迷必揀。

放大圖片	2.0公升引擎配上Turbo，馬力高達245hp。	尾箱容量為500L，可透過翻平後座擴展至1,400L。
將行車模式切換至Sport+，能賦予更富動感的操控表現。	多功能真皮軚環可控制音響系統，後方還設有加減波按鍵。	波箱設有八前速，轉波敏捷流暢。

運動底盤攻彎順暢

普遍認為高車身過彎較論盡，不適合快跑，但這個假設老早已被保時捷Cayenne否定。或者有人會說Cayenne賣到這個價位梗得，不過我想講，即使X4這些中價位SUV一樣可以好跑得，攻彎平穩性並不遠遜於同門房車，底盤設定偏向運動化，抗傾性能出色，出彎後車身很快便可歸中，絕不拖泥帶水。比起X6，車體相對小巧的X4在彎中更為瀟灑，並導入了Performance Control，系統可按實際需要自動分配四輪動力，過彎時甚至可對內彎車輪施加適當力度的制動，令轉向更加順暢，就算以頗高速入彎都沒有出現轉向不足的情況。平心而論，X4 xDrive28iA只是一款偏向運動性能的SAV，過於激烈的駕駛還是不太適合，也不要跟3系的操控比較，兩車各有優點長處，定位也不同，追求極致的駕駛性能，揀330i，夠Budget就340i，甚至M3。若同時對實用有高要求，X4就理所當然了。

高、低都用上Xenon燈，提供明亮的照明。

原廠配上17吋輪圈，輪胎尺碼為225/60 R17。

錶板設計一貫BMW特色，由多個圓形儀錶組成。

選配裝備增豪華感

若問我X3與X4應該點揀，這個很難說，車價、性能及實用性都非常接近，外觀似乎是主要考慮因素，各花入各眼，但表面上X4較有新鮮感，筆者會先揀。越野性能如何？冇機會試，亦沒想過試，X4主打的是On-road操控樂趣、舒適及實用性，Off-road性能答唔到你，不過上網很容易便搵到相關片段，若非玩重度Off-road都可應付自如。X4 xDrive28iA現時以$567,000開售，價錢頗有吸引力，惟多項常見設備都要另外選配，如前座Sport Seats、天窗及後泊鏡等，加埋晒大概$60萬先可以埋單，不過買得BMW，當然要打造更舒適及豪華氣派，都唔差在嗰幾個巴仙車價啦！

車頂天窗屬選配裝置，可前後滑動或向上揭開。	後排空間十分闊落，腿部伸展空間充足。	原廠配備Park Distance Control，與障礙物距離一目了然。
後排設有獨立冷氣送風口，全車乘客都有涼風送至。	離地距較一般私家車高，方便出入崎嶇路段。