Mio MiVue 688D前影後拍

偵測「白鴿籠」

688D的特技又點止拍到前後畫面咁簡單，最強係可以偵測俗稱「白鴿籠」的快相相機位置，提示檔會依運輸署的官方資料定期更新及供用戶下載，透過車Cam內置的GPS和專利測速照相功能，一旦接近「白鴿籠」就會提示司機，而提示距離可以自行設定，例如500米、1,000米等，畀你有足夠時間收油，避免硬食「牛肉乾」。另一得意技能就係移動偵測功能，每當有物體從前後鏡頭移動或經過，車Cam都會自動拍低短片，就算停車熄匙都用得着，作用係就算有車輛撞到你的座駕不顧而去，都有條片可以搵得番佢。另外，車Cam亦有車道偏移、太接近物體提示，仲可以透過專用胎壓套件，偵測四條胎的狀態，功能夠晒貼心，估唔到車Cam都有咁多用處。

前鏡頭內置200萬像素的Sony感光元件，拍到1080@30p全高清片，仲用上F1.8大光圈，夜晚拍片都咁清。	的骰小巧的後鏡頭視點達140度，基本上車尾環境都拍得晒。	一旦接近快相相機，測速照相功能會發出聲音提示減速，並可因應需要設定提示距離。
透過專用胎壓套件，就可在車Cam睇到每條車胎的胎壓和胎溫狀況。	就算停車熄匙，每當有人或車在前後畫面經過，移動偵測功能都會自動拍低影片，萬一有人搞過架車都一清二楚。

撰文：黎子豪

攝影：張錦昌

模特兒：Rose（Pure Models）

查詢電話：3619 6500