日本直擊！Sensor愛鬥大 三廠強攻CP+

Nikon DL系列 1吋Sensor DC三機搶灘

早喺上月嘅CES展覽，Nikon已發布D5和D500旗艦單反，以為CP+再冇新機推出之時，殊不知現場卻殺出3部1吋大Sensor嘅DL系列DC。三機嘅規格接近，同樣提供2,081萬像素、4K拍片、Wi-Fi等功能，主要分別在於鏡頭和機身設計，焦段和光圈更展示於型號上，當中DL24-500 f/2.8-5.6長炮機，擁有20.8倍變焦能力，小記遠攝試影時發覺成像銳利又穩定，明顯針對旅行而設計；另有黑、銀兩色嘅DL24-85 f/1.8-2.8，用上大光圈標準鏡頭，人像Snapshot大派用場；而DL18-50 f/1.8-2.8強調加入Nano Crystal Coat塗膜，18mm超廣角影風景一流，預計6月見街。

X

高速移動的模型車，喺Nikon展區畀影友測試不同機款嘅連拍同對焦速度。	DL24-500 f/2.8-5.6擁有20.8倍變焦鏡頭，VR防震提供一般或運動兩種模式。	DL18-50 f/1.8-2.8（左）及DL24-85 f/1.8-2.8（右）內部規格接近，支援4K攝錄及Wi-Fi功能。
DL24-85 f/1.8-2.8機頂備有閃光燈和Hotshoe，後者可加裝電子觀景器。	DL18-50 f/1.8-2.8提供18mm超廣角焦段，鏡頭加入Nano Crystal Coat塗膜。

Pentax K-1 嶄新扭芒設計

Pentax向來主力研發APS-C相機，早前出過645中片幅大機，今次加推K-1全片幅單反都唔算好意外。新機內置3,640萬像素感光元件，最過癮係機背3.2吋屏幕唔似一般屏幕咁翻揭，而係拉出嚟扭來扭去。轉盤則備有Grid和Crop模式，前者可選擇於光學觀景器加減格線；後者可揀全片幅或APS-C片幅，間接延伸鏡頭焦距。

Pentax K-1手柄設計夠深，長時間拎住都冇咁易攰。

K-1用上3,640萬像素全片幅感光元件，感光度支援最高ISO 204,800。

X

背面3.2吋芒可以拉出來調校角度，活動幅度更大，取景倍添靈活。

展出一系列周邊產品，例如T-Shirt、杯、相機袋等，設計精美。

Sigma sd Quattro 高解像打孖上

Sigma新機sd Quattro和sd Quattro H，無論外觀和設計都幾乎一樣，分別在於前者用上APS-C片幅，擁有2,900萬像素Foveon X3 CMOS，後者用上APS-H片幅，可拍攝出最高8,768×5,840解像度相片。兩機整體布局同以往Sigma機款大為不同，幸好設有236萬像素電子觀景器，取景顏色都幾鮮艷，背面則用上3吋闊屏，可同步顯示拍攝參數和菜單，操控更得心應手。

sd Quattro和sd Quattro H可配上Sigma自家嘅SA接環鏡頭。

Sigma展區中間設置了一棵樹，供影友試拍。

X

機背提供電子觀景器和闊屏，屏幕可顯示拍攝參數和菜單。

sd Quattro（左）和sd Quattro H（右）外觀上冇乜分別，內裏用上不同片幅感光元件。

特派記者：黎子豪