西班牙直擊！教主都Like Galaxy S7夜拍王

IQ題，世上究竟有乜嘢能令facebook教主Mark Zuckerberg唔陪老婆同個女，仲要遠赴西班牙呃Like？答案係年度機王Samsung Galaxy S7及S7 edge！兩機首度加入Dual Pixel技術，夜拍仲靚過iPhone 6s Plus；另引進IP68防水規格及增設記憶卡槽，3月中有售，大家仲有一個月儲錢咋！

S7及S7 edge將於3月中上市，預計售價為$6,000港元左右。

睇Show式發布會

小記去了多年西班牙Samsung Unpacked發布會，論驚喜及心思，今次可說是歷屆之冠。單是主舞台採用演唱會式的四面台設計，猶如睇Show咁有Feel。開場後仲加插Gear VR觀看宣傳片環節，虛擬機王S7在眼前飛來飛去，眼界大開。新機外形沿用上代設計，選用玻璃及金屬物料製成，底面均有2.5D弧形玻璃修飾，雖然感覺高貴，但創意似乎爭咗啲。幸好機身比上代圓潤，加上鏡頭由凸變平，拎上手加回不少分數。

夜攝清過iPhone

S7及S7 edge分別配備5.1吋和5.5吋屏幕，維持2K解像度及Super AMOLED面板，輸出鮮艷奪目，可惜仍脫不了味精感覺。而屏幕追加Always-On Display功能，可於休眠時顯示時間、日期及待機圖案，毋須喚醒手機，實用又慳電。至於S7 edge兩邊側屏的Edge UX捷徑列亦明顯加闊，並提供即時新聞、指南針及球賽結果等工具。兩機的主鏡頭稍稍降至1,200萬像素，但換來F1.7大光圈，配合Dual Pixel技術，吸光量比上代大增95%，官方以iPhone 6s Plus的夜拍相片比較，放大後可見S7成像更清更利，叫人期待！

S7（左）及S7 edge（右）分別配備5.1吋和5.5吋屏幕，並支援2K解像度。

S7（左）及S7 edge（右）分別配備5.1吋和5.5吋屏幕，並支援2K解像度。

S7 edge側屏Edge UX捷徑列變闊，並追加即時新聞、指南針等工具。

Galaxy S7（左）首度支援Dual Pixel技術，夜拍比iPhone 6s Plus（右）更細緻。

Galaxy S7（左）首度支援Dual Pixel技術，夜拍比iPhone 6s Plus（右）更細緻。

超誇張跑分結果

S7的拍攝介面冇大改變，但對焦明顯比上代更爽，並加入Motion Panorama功能，可將全景相變成Live Photos般動態顯示，並可邊捽邊改變視點，過癮！

大會請來facebook教主Mark Zuckerberg站台兼介紹fb 360功能。	加設microSD卡槽，仲做足防水防塵保護！	沿用大獲好評的鏡面機身，同時鏡頭由凸變平，改善手感。
Motion Panorama功能將全景相變成Live Photos般可邊捽邊改變視點。	《AnTuTu》跑分高達124,166分，超誇張！	現場花絮主舞台採用四面台設計，讓觀眾猶如睇Show一樣。