Bumball臀體戰黐波搶分

特製魔術貼裝備

源自丹麥嘅Bumball有近8年歷史，設計呢項運動嘅係一位體育老師，希望藉其趣味性和視覺體驗，吸引更多人參與運動。Live-Games平台Awesomer近日將此引入香港，負責人Sunny表示：「玩Bumball首要準備3樣基本裝備，包括胸部和臀部位置附有魔術貼嘅特製球衣；表面同樣設有魔術貼嘅特製波，以便黐喺球衣上；最後係代表得分區域嘅呼拉圈，湊齊6個人分兩隊就可以開波！」

臀部接波獲3分

開波時雙方各派出一位球員像籃球般進行跳球，不過球證拋起個波後，雙方唔係用手去搶，而係背對背以臀部搶波，萬一個波跌咗落地，其他球員便可用臀部黐起個波，臀部黐波嘅好處係可以喺場內任意走動，但自己絕對唔可以用手掂波，反而敵人或隊友可以用手去搶。不過用手搶到波後，重心腳就唔可以再郁，必須將波傳畀隊友，當然對方可以人盯人攔截。

Bumball表面滿布魔術貼，內裏由硬身海綿組成，重量大約一磅左右。	特製球衣在胸部和臀部都設有魔術貼，用來黐實個波。	每逢開波或出現爭議球，便會進行跳球，由雙方各派一位隊員以臀部爭波。
注意傳球得分距離必須保持2米以上，而且最少要有一隻腳踩住得分區，否則得分無效。	Pat Pat黐波時，可以在場內任意跑動，只是隊友和敵人可以用手去搶。	只有搶波同傳波有機會用手，不過當手一掂到波就冇得周圍走。

傳球時隊員若然以胸部黐波的話，則可以自己用手取球策動攻勢，Sunny稱：「想得分的話，隊員至少要有1隻腳踏進得分區內，用胸部接波會得1分，以臀部接波可得3分，隨時能反敗為勝。」

場地會擺放多個由呼拉圈組成嘅得分區，每個距離最少2米以上。	Awesomer負責人Sunny指出，Bumball唔講求體能，不過身手愈靈活愈着數。	韓國人氣綜藝節目《Running Man》都玩過Bumball，不過為咗搞笑改咗啲規則。

室內樓底要夠高

Bumball其中一個目的係Team Building，傳統玩法以6 Vs 6，當然香港場地有限，人少少3 Vs 3都冇問題。今次在Hi Five Soccer室內足球場試玩，便可同時容納8位球員，Sunny指出：「無論室內或戶外都可以玩Bumball，不過室內嘅樓底要夠高，事關球員好多時要跳躍和傳波，太矮的話有機會撞到。」至於得分區數目以每隊人數加1為標準，例如3 Vs 3的話，便需要擺放4個得分區，得分區之間的距離需要2米以上。至於時間方面一般會分2至3節，每節大約7分鐘，完場時得分多嘅一方為勝。

活動詳情

Bumball都有變種玩法，早前Awesomer大搞夜光活動，由球衣、波到得分區都加入夜光物料，增添氣氛。Bumball都有變種玩法，早前Awesomer大搞夜光活動，由球衣、波到得分區都加入夜光物料，增添氣氛。

除了Bumball外，Awesomer網站可以搵到唔少新興活動。

活動資料：

費用：$1,600/小時（8~16人）、$1,900/小時（12~24人）（連場地）

查詢電話：9780 5804

網址：www.awesomer.com.hk

變種球類活動

Awesomer同期引入咗好多有趣嘅變種球類活動，當中值得推介有Ki-O-Rahi及Poison Ball。

Ki-O-Rahi 投擲目標

新西蘭毛利人部落流傳嘅活動，場地中間設有一個目標，圍繞住中心目標有一個防禦圈，外圍則屬進攻圈，以及由7條標記組成嘅中立區，雙方球員需要佩戴附有兩條尾巴嘅腰帶。攻方利用掟波方式，要將波掟入中心目標，又或者以球掂到標記得分。至於守方要防止中心目標被掟中，又或者撕下對方腰帶嘅尾巴去阻止攻勢，玩落有少少似非撞式欖球。

Poison Ball 巨型閃避球

Poison Ball是由Omnikin團隊研發嘅體健活動，勝利條件係將對手全部送入「救護區」。其玩法簡單，場內設有3個不同顏色嘅巨球和障礙物，玩家想移動巨球時必須用手推波，然後拿起它來投向對手，擊中的話便可將對手送入「救護區」，萬一投球被對方接到，投球者則要移到「救護區」，換言之玩家需要不停咁走動、閃避和接球。

撰文：黎子豪　

攝影：張錦昌

模特兒：Tinky（Inflate）、Winifred

場地提供：Hi Five Soccer