薑檸樂都有女？毒男放閃攻略

過時過節，一個人已經夠孤獨，仲要望住「街裏愛人一對對」，都咪話唔慘！不過，情人節並非世界末日，只要用些自拍技巧，單身朋友都可以有「一個人的約會」。連網絡紅人兼毒男教主薑檸樂，都忍唔住試玩各式「晒命」自拍招數，喺情人節呃吓Like，大家覺得夠唔夠閃呢？

毒男薑檸樂

第一式：捏臉嘟嘴晒恩愛

情人節一早，女友將我塊臉「搓圓撳扁」咁弄醒我，又幾冧喎，等我扮瞓同佢玩多陣先！

放閃度：3★

可行度：5★

（以5★為最閃）

拆解
影呢張相前你先要有個女朋友，即係閣下「右手」，將淺色BB底霜塗勻手背，修剪指甲後塗上鮮紅色指甲油，一隻漂亮白滑嘅女仔手便大功告成。之後左手拿着手機，右手輕輕往嘴邊捏一下即可拍攝。

第一式：捏臉嘟嘴晒恩愛

左手揸機，右手捏臉，配合埋嘟嘴表情神似度十足！

第二式：互相餵食甜入心

午餐時女朋友硬要餵我食飯，好啦，見你咁乖，我又餵番你食先！

放閃度：4★

可行度：5★

拆解拆解
Keep住女朋友係「右手」，左手拿手機影相，右手拎住食物往左邊臉靠近，合埋眼張開嘴扮陶醉，這張相手腕愈傾側愈似，務求把食物及玉手都攝於鏡內。

第二式：互相餵食甜入心

右手拿着食物往左邊臉靠近，合埋眼張開嘴扮一臉陶醉即可。

第三式：十指緊扣防走失

歌仔都有唱：「誰都知雙手可緊扣，不依不捨的背後……」拖實BB就唔怕畀人搶走！

放閃度：2★

可行度：3★

拆解
「右手」女友繼續出場，不過今次要反手，再用你嘅左手拖住「佢」。然而，影呢張相難以自己揸相機，建議在身後Set定腳架玩倒數自拍，背景最好有啲途人入鏡，以營造拍拖逛街感覺。

第三式：十指緊扣防走失

左手拖右手這個動作需要極高柔韌度，拍攝前記得先行拉筋。

第四式：互相擁抱扮偷情

情到濃時，在街上難免情不自禁擁抱親熱，由得旁人葡萄我吧！

放閃度：4★

可行度：3★

拆解
這次需要假髮道具上陣，喺女人街買唔使$100，比買隻Game仲平。拍法很簡單，先喺鬧市找個角落，假髮放喺近膊頭低少少位置，再用左手抱緊自己，最後Set好腳架便可拍攝。更高明的方法是從高角度拍攝，營造偷拍嘅真實感。

第四式：互相擁抱扮偷情

手機腳架是必須，另外要注意拍攝角度，高角度的真實感更強烈。

第五式：輕輕一錫定終身

喜歡與愛人親吻，不過影臉似乎太過炫燿，還是影腳等別人幻想一下！

放閃度：4★

可行度：2★

拆解
這次需要的道具較多，西褲、白襪、男女裝皮鞋缺一不可。先穿上白襪及女裝皮鞋，雙手再穿過西褲及男裝皮鞋，繼而彎下腰，腳踭微微上升，最後從雙腳以低角度拍攝即可。拍這張相需要有強勁腰力，因為男裝鞋稍稍離地就唔似。

第五式：輕輕一錫定終身

影唔難，準備道具先難，家中要有女裝皮鞋加白襪！

第六式：法式激吻藏布幕

一對男女透過光線的剪影接吻，往往叫人心動，等我來招巴黎鐵塔反轉再反轉！

放閃度：5★

可行度：1★

拆解
剪影接吻法需要的道具包括一塊白布幕、一部手機加腳架、一個電筒，另外還要準備一隻心愛的女性Figure。拍攝前先將電筒光源照在Figure，其剪影便會投射到白布幕，之後閣下只要校啱角度入鏡，再發揮無窮想像力便可拍攝。留意此拍法需要就位，試多幾次便能拍出閃爆作品。

第六式：法式激吻藏布幕

剪影接吻法需要大量道具及無窮毅力，缺一不可！

放大圖片

試玩後感

薑檸樂平時扮宅男就扮得多，今次試玩放閃招數，覺得最似係頭兩式用「右手」扮女友自拍，唔使用道具之餘，仲可以瞓喺度影，隨時「晒命」都冇問題。最難嘅招數要數同公仔合照，皆因就位比較麻煩，要試多幾次先至成功，咁樣放閃真係有血有汗！薑檸樂還想加入拍片元素，將自己扮埋做女仔分飾二角，再後期剪接埋一齊，以浪漫MV為主調，最後才揭曉女主角真面目！