美國CES直擊！4大戰場鬥收視

鬥畫質！LG 98吋8K TV精細悅目

小記經過LG展區時，見到大批人塞喺入口，唔係為咗排隊進內，而係入口搭建了由數十台OLED TV構成的巨型電視牆和天幕，播放着耀目璀璨嘅影像，效果非常吸睛。入到展區內可見四周擺滿新款電視，當中旗艦級Super UHD TV升級至webOS 3.0智能平台。

講到全場焦點可說是其首部98吋8K電視UH9800，具備7,680×4,320解像度精細畫面，顏色鮮艷細節盡現，難怪吸引勁多人圍觀。廠方於展區另一邊以OLED TV作為主打，如G6及E6系列以纖薄機身作賣點，厚度只有2.57mm！除了電視之外，廠方帶來K10和K7手機，前者備有5.3吋屏幕、八核心處理器、2GB RAM和1,300萬像素鏡頭；至於後者則有5吋芒及500萬像素鏡頭，分別針對中低階市場。

以多部OLED TV建構而成的電視牆和天幕，吸引唔少人駐足觀看。	展出一系列以「LG Signature」為概念的高階數碼產品。	4K OLED TV是廠方今年主打項目，標榜電視色水靚、機身薄。
新推出嘅K10（左）和K7（右）手機，分別提供5.3吋及5吋屏幕，主攻中低階市場。

鬥巨芒！Samsung全球最大170吋SUHD TV

同樣來自韓國嘅Samsung，場內一樣人頭湧湧，皆因擺放了全球最大嘅170吋SUHD TV，長闊分別有18.3米和4.8米，想睇晒成部電視真係要企後幾步。SUHD TV採用Quantum Dot Display技術，現場睇無論色彩、亮度及對比度都超班。另一焦點落在全新模組化顯示技術Modular Display，電視由多塊模組合成，能因應影像分割和合併，配合無縫方式展示影像。大電視和模組化顯示技術得個睇字，真正可以拎上手玩嘅有Galaxy Tab Pro S平板，機身可連接鍵盤變作Notebook使用，加上具有12吋2K屏幕、第6代Core M處理器及4GB RAM，配合Win 10系統相信是專攻白領一族。

Samsung展區入口兩邊以多部SUHD TV堆砌起來，效果相當震撼。	要企後幾步先睇得晒呢部全球最大嘅170吋SUHD TV。	模組化顯示技術會根據影像合併和分割，加上無縫設計，相信是未來電視雛形。
特設VR 4D體驗區，戴住Gear VR眼罩不僅睇到虛擬實境影像，還備有震動座椅。	Galaxy Tab Pro S擁有12吋大芒，最大特點係唔用Android系統而改用Win 10，仲可配合鍵盤操作。

鬥影音！Sony 4K BRAVIA對應HDR功能

日本廠方面以Sony最多嘢睇，場內展出了多款支援HDR技術嘅4K BRAVIA電視，如具備超薄背光技術（Slim Backlight Drive）的X93D系列，能顯示出高亮度及高對比畫面。廠方亦針對Hi-Res Audio推出PS-HX500唱盤，它不僅可用嚟聽黑膠唱碟，仲能將黑膠曲目轉化成Hi-Res Audio檔案，將新舊技術融合絕對係樂迷之福。另有以潮味見稱嘅EXTRA BASS系列，當中GTK-X87喇叭備有多色選擇，播歌時會發出不同顏色光芒，加上主打重低音效果，現場試聽極之震撼。

Sony展區以圓形圍牆環繞而成，長期人山人海。	PS-HX500黑膠唱盤除咗可以播黑膠碟，仲可將歌曲轉換成Hi-Res Audio檔案。	全新Sony電視以「4K HDR」標示，強調支援HDR功能。
EXTRA BASS系列GTK-X87加入重低音單元，播歌時會泛起不同顏色光芒。

鬥技術！Panasonic電視首玩HCX+處理器

一轉頭走到Panasonic展區，可見場內主打未來概念，布置相當科幻，還展出全球首部4K Ultra HD Premium TV，內置全新Studio Master HCX+（Hollywood Cinema eXperience）4K處理器，現場所見無論光暗位及色彩表現都相當出色，帶來逼真的電影感。另展出了Ultra HD Blu-ray播放器DMP-UB900，支援4K及HDR技術，對應DSD、FLAC、WAV等Hi-Res Audio數碼音樂檔案。

Panasonic展區以充滿科幻感的未來設計為概念。	Ultra HD Blu-ray播放器DMP-UB900，具備4K播放及HDR功能。	工作人員表示新一代4K Ultra HD Premium TV用上HCX+處理器。
同場還設有測試Action Cam嘅場地，廠方特別搵人爬來爬去表演。

特派記者：黎子豪