5.2吋無邊Crystal 2跳出框框

「想創新就要跳出框框！」原來不僅係人生道理，仲適用於手機，不過此框不同彼框，講緊由日本水路抵港嘅AQUOS系列Crystal 2，5.2吋屏幕於上、左、右三邊加入獨特玻璃切割技術，營造出「無邊」視覺效果，機側仲設有觸感功能，毋須按鍵便能着芒及調校音量，創意爆燈！

AQUOS Crystal 2 售價：$3,680

S-Pure LED新「睇」驗

近年廠商為咗用盡手機屏幕，紛紛從邊框着手，不過講到幼框點都唔及來自Sharp嘅AQUOS系列。繼Crystal及Crystal X之後，最近加推Crystal 2，機面上、左、右三邊都超幼，僅得1mm左右，而機面玻璃刻意以斜面切割，配合光線折射下，塑造出近乎Frameless無邊框視覺效果，睇相時有種全屏幕開揚感。新機嘅5.2吋720p屏幕更採用自家S-Pure LED技術，顯示三原色時會較鮮艷，無論播片或睇相都更搶眼，另內置Quality Mode包括Dynamic、Natural、Relax等5款顯示模式，屏幕會自動調整色溫及亮度，長時間望住個芒都唔怕雙眼攰。

Grip Magic觸感功能

新機改良邊框之餘，連機側都新增Grip Magic觸感設計，用家單手握機時可啟動常用功能，例如將屏幕亮着、來電時將鈴聲音量降低等，相當貼心。另備有Mini Apps及Clip Now功能，前者可於畫面以小視窗同時開啟《Maps》、《Album》等程式；後者讓用家掃動機側來擷取屏幕畫面。而且長按Home鍵再左右撥動可將畫面縮細，啱晒鍾意單手玩機嘅小記使用。

機背用上磨沙物料，手感不俗。	斜面切割玻璃令觀感更佳，惟11mm弧形機身略嫌太厚。	支援IPX5/7防水防塵標準，nanoSIM及microSD卡槽設有保護蓋。
機背設有800萬像素鏡頭及LED燈，拍攝質素唔錯。	測試區：「無邊框」效果下睇相，畫面觀感開揚，主體零舍突出。

效能方面，此機屬中階級數，用上Snapdragon 400四核心處理器及2GB RAM，配合Android 5.0作業系統及自家「Feel Like」介面，操作都算流暢。值得一讚是800萬像素鏡頭成像質素幾高，提供Manual（手動）、Monochrome（黑白）、Time Lapse（縮時攝影）等多種拍攝模式，想影得專業又得，間中增添玩味亦冇問題。