11.6吋EHNB116A 抵玩Win 10筆電

手提電腦愈出愈平，現時只要付出千多元便可擁有一部11.6吋嘅Win 10手提電腦！講緊係開價$1,799嘅WMP EHNB116A，外形雖然唔算特別，但機身厚度只有17.5mm，重量亦不過965g，非常輕巧。機身備有金色及黑色兩種配色選擇，少少缺點係鋼琴黑機背容易沾上指模。新機配備朱古力鍵盤，手感還算合格，用來文書工作綽綽有餘，而Touchpad支援如快速捲軸等手勢操作。至於硬件規格方面，配備Intel Atom Z3735F處理器及2GB RAM，效能其實都唔差，就算以預載的播放器睇片都唔窒，而且充滿電後可玩到7、8小時，不過得32GB ROM要慳住用。