HTC Vs LG人氣水貨機平價較勁

一年容易又聖誕,機Gor又煩緊買乜禮物畀機嫂,好彩行經先達即刻有頭緒,皆因水貨舖連入咗兩款新機,分別係由HTC專為日本市場打造的第三代Butterfly HTV31,同埋韓國LG首部全金屬製嘅Class。兩機咁啱得咁蹺分別賣$2,380,一於測試吓邊部啱做聖誕禮物。

HTC J Butterfly HTV31蝴蝶三代目

行家近年戲謔HTC全名為「Help This Company」,出機成日自己打自己,究竟佢想點,連機Gor都諗唔通。相比起國際市場,廠方喺日本獨沽一味出Butterfly系列反而仲有起色。呢部HTV31屬第3代「蝴蝶機」,硬件與同廠One M9睇齊,而且內置Duo Camera雙鏡頭,影相出色。它早前由日本網絡商au推出,「軟解」SIM Lock後近日登陸先達,平價機又多一個好選擇。

LG Class金屬第一炮

LG近年憑皮革手機殺出一條血路,G4及V10叫好又叫座,只不過皮革機嘅耐用度和防污度始終冇金屬機咁好。有見及此,廠方喺韓國推出旗下首款全金屬製嘅5吋手機Class,試一下水溫,為將來推出金屬旗艦機鋪路。其規格只屬入門級,當地定價399,300韓圜,折合約2,600港元,以Entry Level來說定價偏高,幸好來港後售價不升反跌,賣二千頭有番啲競爭力。

第一回合:鬥手感操控

送禮畀女朋友,體面相當重要。金屬機身的LG Class高貴紮實,無論賣相或造工都比膠製嘅Butterfly HTV31好得多。而且佢只有147g重、7.4mm薄,配合彎曲邊框,女仔纖纖玉手使用啱啱好;反觀HTV31重162g,焗漆機背容易沾上指模,潔癖人士未必Like!操控方面,Class設有Rear Key背掣,方便單手使用;加上全中文介面及《QMemo+》、《LG Backup》等預載Apps,用落同行貨冇乜分別。HTV31則採用au自家UI,大量日本Apps睇得唔用得,論親切感唔及對手。

第二回合:鬥性能電量

兩機雖然定價一樣,但內涵差好遠,HTV31用的是Snapdragon 810處理器配3GB RAM,《AnTuTu》跑分高達52,302,撥頁開Apps爽快有勁,而且熱量亦控制得好好,長玩遊戲都只有微溫,抵讚!反之Class採用Snapdragon 410處理器搭2GB RAM,《AnTuTu》跑分只有22,460,差對手好多,而且金屬機身都幾傳熱。電量方面,機Gor以《Star Wars︰指揮官》手機遊戲測試,兩機都係玩一陣就冇咗三成電,不過HTV31支援Quick Charge 2.0,唔使兩個鐘充滿電量,呢方面加番分數。

第三回合:鬥拍攝功能

聖誕出街總唔少得影相,HTV31用咗2,020萬像素Duo Camera,可拍攝4K片之餘,仲支援景深調校、雙重曝光、強制3D等效果,配合手動模式可調校光圈、快門、ISO等,功能豐富。Class用的是1,300萬像素鏡頭,成像質素及防手震技術不及對手,影夜景容易鬆郁朦;幸好色彩層次感較強,並可後製加入特效,如Venus是強化飽和度、Pluto變成黑白相,喜歡何者就要睇看倌了!

三禾電氣店長Simon︰「留意水貨手機網絡問題!」

「受惠於日圓低迷,日系手機嘅售價持續向下,以前旗艦機動輒要五、六千港元,現在二千幾元就有交易。韓國機嘅情況類近,香港有嘅行貨如Note 5等,韓版水貨平均便宜近千元,所以吸引力極大!不過買水貨手機要注意網絡問題,皆因日系機一般只有LTE 1800一個4G頻道適合香港使用,購買時要考慮埋電訊商嘅頻道是否兼容,以免影響上網速度。而韓版機則以K版及S版作主流,它們均支援LTE 1800,至於L版只有部分型號支援,所以K版與S版比L版較受歡迎。」

機Gor Report:「蝴蝶」省招牌 抵玩推介

雖然兩部水貨機售價相同,但定位卻分別極大。「蝴蝶機」HTV31是HTC在日本省招牌之作,規格媲美同廠機王,只因日圓低迷現在才大平賣;LG Class則以高貴外觀包着低階內涵,明顯是試水溫之作,定位變得有點尷尬。無論送禮或自用,機Gor認為Butterfly HTV31有較高性價比,可說是抵玩推介!

HTC J Butterfly HTV31規格表

制式︰GSM、WCDMA、LTE

處理器︰Qualcomm Snapdragon 810 2GHz八核心

記憶體︰3GB RAM、32GB ROM、支援microSD

屏幕︰5.2吋Super LCD3(2,560×1,440解像度)

鏡頭︰(前置)1,300萬像素、(後置)2,020萬像素

電池容量︰2,700mAh

作業系統︰Android 5.0

體積︰151×73×10.1mm

重量︰約162g

LG Class規格表

制式︰GSM、WCDMA、LTE

處理器︰Qualcomm Snapdragon 410 1.2GHz四核心

記憶體︰2GB RAM、16GB ROM、支援microSD

屏幕︰5吋IPS(1,280×720解像度)

鏡頭︰(前置)800萬像素、(後置)1,300萬像素

電池容量︰2,050mAh

作業系統︰Android 5.1.1

體積︰142×71.8×7.4mm

重量︰147g

機Gor Profile

機不離身,不信Spec只信測試,不扮高深,懶理低俗,貪新不忘舊。

撰文:機Gor

查詢電話:2374 0618