山攝芒草四式拍出文青Feel

秋高氣爽,最啱行山遠足影吓相,但香港有咁多山嶺和郊遊徑,究竟邊處先至係必到之選?踏入11月尾,大東山芒草生長得最為茂盛,趁山上人未多、草未枯嘅時候,梗係要扮文青影吓相博Like,一於請山攝達人「山道行者」Eric和Virgina,帶大家上山分享芒草拍攝心得。

大東山影爛頭營

上大東山有幾條路線可揀,包括伯公坳、南山、石獅山等,不過多數人都會選擇伯公坳,皆因坐巴士已去到近山腰位置,只係落車後前半段有一條「天梯」,要1.5~2小時路程才到達。大家攻頂都係想影到一大片芒草,不過就咁影未免過於單調,「山道行者」教路:「大東山的拍攝元素可分為人、山、太陽、芒草、雲海和爛頭營,當中最大特色可說是後者,無論以爛頭營作主體、前景抑或後景都咁靚,在金黃色的芒草襯托下,利用色彩對比令構圖更豐富;若然拍攝人像的話,不妨走到芒草中間,被高高的芒草包圍同樣震撼。」

逆光拍攝好氣氛

影相除了人和景,夾啱天時地利都好重要,「山道行者」表示:「不同時段上山影芒草都好唔同,最多人留守嘅時間係5~6點左右,因為日落時陽光照射到芒草,會呈現金黃色。善用光線都好重要,順光拍攝會令四周環境的色調平均,不過我就鍾意逆光多啲,例如近攝芒草時以手動對焦,並以太陽為背景進行逆光拍攝,至於收細鏡頭光圈,會令太陽帶有星芒效果,畫面獨特富層次。」

淡色調清新浪漫

影芒草的色調可以有好多變化,有人鍾意遍地金黃,亦有人喜歡淡黃感覺,「山道行者」透露:「假如大家鍾意文青Feel,拍攝時可使用鎢絲燈白平衡或調低色溫,而爛頭營上空經常有雲,使相片顯得昏暗,所以不妨略為提高1/3級曝光,令畫面變得光亮。此外,拍攝時可用RAW檔案,然後返屋企用《Camera Raw》或《Lightroom》調校色溫和顏色,我哋偏好淡色調,感覺清新得嚟又浪漫。」

達人「拍」檔

Virgina's Gear

雖然Virgina係女仔,估唔到會用Canon EOS 6D單反相機,事關機身淨重680g,連埋鏡頭等裝備帶上山絕不簡單。不過它備有2,020萬像素全片幅感光元件,配合24~70mm F4鏡頭,無論廣角大環境,抑或人像拍攝都兼顧得到。

Eric's Gear

Eric選用機身輕巧的Sony α6000,機動性高加上配備2,430萬像素APS-C感光元件,配以16~70mm F4鏡頭,相等於24~105mm的轉換焦距。它近期還愛上Time Lapse拍攝,相機影相時自己可以慢慢欣賞景色。

芒草拍攝熱點

影芒草又點止得大東山,其實香港仲有好多地點影到芒草,如飛鵝山(圖示)沿着山路都有芒草生長,不過山路狹窄險要,攀登難度不下於大東山,但勝在人流較少。另一熱點是馬鞍山昂平高原,從馬鞍山郊遊徑行約1~1.5小時可達,平原空曠遼闊,幾乎整個山頭都布滿芒草。

撰文:黎子豪(部分相片由受訪者提供)

查詢電話:(a)3191 2333、(b)2345 2966