充氣障礙彈跳碰狂熱升Run

路線長5公里

充氣障礙跑其實喺美國Hit咗一段日子，估計下年有超過100場賽事，受歡迎程度可想而之。下周喺香港舉行嘅Crazy Inflatable Run，就係將美國Insane Inflatable 5K嘅玩法和模式移植過來。路線全程有5公里長，中途共擺放11件巨型充氣障礙物，計落每隔幾百米就要挑戰一個關卡，充滿驚喜和刺激元素。不過今次唔似外國又玩水又吹泡沫，反而加設親子跑讓一家大細齊齊跑，玩得安全又放心。

挑戰11大關卡

要大家一邊跑一邊穿越障礙物已經好消耗體力，難度在於每款障礙物都有唔同嘅穿越技巧，例如頭兩關要瀡滑梯，又要避開滾動波波，之後有木人樁、踩地洞等關卡，不時要手腳並用，考各位嘅身體協調；當中最難要數尾二嗰關，玩家先要跨過水泡陣及欄杆，之後仲要爬上斜坡，瀡番落嚟繼續跨欄再上坡，極之消耗體力。

充氣欄杆嘅位置幾高，要手腳並用先跨得過。	障礙物嘅彈力十足，跳落去有啲彈床Feel。	當然唔少得瀡滑梯，算係慳水慳力嘅關卡。

巨型彈床漫步

大會早前率先開放其中的障礙物供試玩，小記當然要一試身手，實物睇呢個類似8字形嘅障礙物，藍、綠、白撞色好搶眼，而且Size有一個3人足球場咁大，高度近3米，主辦單位話呢個龐然巨物只屬Medium Size。由於它用上高韌性物料製成，加上不斷充氣，所以跑上去時有點巨型彈床Feel，小記喺上面跑跑跳跳，每腳踩落去都帶有回彈力，似足太空漫步咁過癮。不過四圍彈嘅代價係換嚟雙腳痠軟，一個唔留神隨時企唔穩，好在跌喺充氣彈床都唔怕受傷，大家可以放心四圍仆！

今次試玩嘅第5關障礙物雖屬Medium Size，但有成3米咁高！	Crazy Inflatable Run發起人Nelsun表示：「香港係亞洲第一站，希望大家Enjoy！」	活動喺啟德郵輪碼頭對出嘅空地舉行，大會有Shuttle Bus接送參賽者。

慢跑玩得安全

YouTube有不少外國的充氣障礙跑片段，見到參加者個個搏晒命狂衝，到底Crazy Inflatable Run有乜挑戰策略呢？據是次活動的發起人Nelsun表示，Crazy Inflatable Run並無比賽性質，旨在提供一個開心嘅跑步旅程，所以跑得慢都無所謂，沿途可以Enjoy一下。各位可一支公去玩，亦可自由組隊挑戰，甚至可奇裝異服搶收視，不過大前提係唔好整親人或妨礙其他參加者，仲要記得着番對波鞋，千祈唔好着釘鞋或高踭鞋呀！Nelsun稱：「現時有超過8,000人報名，反應相當熱烈，完成香港首站之後，嚟緊會喺內地、台灣、馬來西亞等地區舉行。」

重點關卡推介 Crazy Inflatable Run路線總長有5公里，當中設有11個關卡，先帶大家睇吓有乜重點推介！	關卡1： 開波先要瀡一條長滑梯，不過咁多人一齊瀡小心撞親。	關卡2： 入面擺放巨型波波四圍碌，要邊行邊撞開佢哋。
關卡3： 沿途勁多吊起嘅波波干擾，要眼明手快用雙手撥開。	關卡8： 睇落好似好易玩，其實地洞相距有啲遠，要大大步跨過，幾考體力。	關卡9： 設有桶狀障礙物，玩家要助跑飛身先穿得過，考各位技術。
關卡10： 跨過水泡陣和欄杆障礙後，有條長長嘅滑梯，上上落落都咪話唔攰。

活動詳情

日期：11月21日（星期六）

時間：9:00am~6:00pm

地點：啟德郵輪碼頭對出空地

費用：$480/人

網址：http://www.crazyrun.co

撰文：林子聰

部分攝影：蔡浩文

模特兒：Michelle（Unique Model）