別手軟，投票吧！
投票啦，開始投票啦！各位千祈唔好手軟，要盡情表達意見，將心水選出來！唔好誤會，區議會選舉11月22日先至有得投，編者是指由《東方日報》汽車世界特別號主辦的「超卓汽車大獎2015」，已經進入投票階段。
今年選舉屬於第二屆，獎項如往年般，同樣超過30個。真係唔覺唔覺，這一年有如此多不同類型的新車到港，所以要表揚的汽車實在多不勝數，而且款款高質素兼各具特色，完全迎合港人講究實用、靚仔、好揸的高要求。雖然編者一向揸開日本車，但有機會評吓歐洲車，甚至豪華車等等，就絕對唔會手軟，把握機會在各個獎項，給票心愛車型。在眾多獎項中，編者印象較深刻，必定是「最卓越歐洲MPV」與「最卓越日韓MPV」了，前者有寶馬打破旗下車系傳統，推出品牌首款七人車全新2系，同時也是首推前置引擎前輪驅動布局，與同門採用後輪驅動截然不同，夠晒突破。
至於「最卓越日韓MPV」就惡鬥了，豐田新一代Sienta型仔科幻Look，加埋1.5公升引擎，搶到不少分數。但本田Stepwgn亦不遜色，尾門可上揭，又可橫開，非常特別。講到尾門，就要留意今期介紹採用對開式尾門的MINI Clubman，只要用腳在車尾踢踢，就可以自動開啟，好玩又實用。此外，封面大作Volkswagen旗艦SUV Touareg R-Line盡顯豪邁；還有007死對頭Mr. Hinx部Jaguar超跑C-X75，食晒潮流，怎可錯過。
朱志華