1:6 Elder Predator血獸再現

Figure迷經過星戰及復仇者系列洗禮後，身家相信所餘無幾，不過Hot Toys又點會畀大家有休息機會呢！最新有《異獸戰》中的Elder Predator，粉絲又要使錢了！一如以往，Figure由本地生化人型大師Joseph Tsang主理，刻意強化皮層鱗片的立體層次及觸鬚質感，盡顯血腥猙獰一面；同時又以藍色軟膠打造辮子頭髮，每絲頭髮均以人手塗上細節並組裝，質感更勝舊版。戰衣方面，與同類Predator一樣穿上重型裝甲，並備有長矛、佩劍、面罩及刺刀，外加一件血紅色斗篷，一看便知是「大佬級」人物。惟要留意，今次Elder Predator不設可換嘴，換句話說冇得展示血盆大口。而頭罩未能戴上，加上關節僅有22個，靈活性一般。