師情草意：西草精華「游」
喺西藥草嘅世界裏面，好多時為咗充分發揮佢哋所蘊含嘅不同植物元素（Phytoconstituents）及養分，西藥草都會以唔同嘅「造型」嚟同我哋見面，當中包括粉末狀、丸狀，甚至以膠囊形式出現都有。不過，如果講到我哋最熟悉又最容易接觸到嘅形態，非精油（Essential Oils）同埋酊劑（Tinctures）莫屬。
平時我哋用到嘅化妝品及個人護理品，當中唔少都宣稱含有某種草本植物嘅精油，純天然物質製造，咁究竟精油其實係乜嘢嚟（口架）？我哋使用精油或含精油產品時需要知道及明白啲乜嘢，以至精油點樣可以更有效咁發揮佢應有嘅功效？至於酊劑對於香港嘅朋友嚟講，則較為陌生，其實佢又係乜嘢嚟嘅呢？應該點用先啱？
其實，精油同酊劑係西藥草最早被人類使用嘅健康護理品及藥品。精油嘅製作方法，係根據唔同藥草嘅特性，將佢哋放入水裏「游」，再以唔同嘅製造方法將佢哋嘅精華逼出而成。常見嘅製造方法包括蒸餾法（常用於萃取精油及花水）、壓榨法（多用於萃取柑橘類植物嘅精油，如甜橙），以及溶劑萃取〔以有機溶劑，如己烷，萃取原精（Absolute）〕。
相對精油，酊劑嘅製作較為簡單。一般做法，只要將藥草放入98%酒精內「游」，封蓋，再將佢放置喺陰涼地方，等待約1至2個月（視乎藥草類型而定），隔渣壓取便可。但由於酊劑含有非常高濃度嘅酒精，剛完成嘅酊劑，必須經過西草藥師調配，並因應相關癥狀及使用者嘅健康狀況，方可使用。
一般市面上售賣含天然精油嘅化妝品及個人護理品，大都使用安全系數（Safety Profile）較高嘅藥草精油，以免用者出現過敏反應。但有一點大家需要留意，使用天然精油製造，並唔代表產品係純天然，當大家喺選購呢類產品時，必須留意產品嘅其他成分，以免因誤用而造成身體不適。
至於酊製，喺歐美國家，一般用者都會先諮詢西草藥師嘅意見，並根據佢哋專業嘅判斷及評估，給予適當分量服用。
要享受精華「游」嘅樂趣，必先了解精華「油」嘅用處。
Alice Chan（陳雅詩）
（Reg. Psychologist）香港註冊心理學家
（Chartered Herbalist）加拿大特許西草藥師
M.Sc.（University of London）
High Dip. Pharma Tech.
Email：alice@wherbta.com
Dr. Bonita T.Y. Chan（陳德宜）
（Nutritionist）營養學家
Ph.D（The Chinese University of Hong Kong）香港中文大學生化博士
前美國Baylor College of Medicine,
Texas Medical Centre疾病機理研究員
前美國University of Pittsburgh疾病機理研究員
Email：bonitatychan@wherbta.com