手機新攝力秒速比併

機Gor身邊有唔少朋友係貓奴狗奴，無時無刻都想為愛寵影靚相，但小動物周圍郁冇時停，想捕捉佢哋搞笑一刻都幾難。計機Gor話，用手機Snapshot嘅機動性就最高，台廠HTC及國產Meizu最近分別推出One M9+相機升級版及PRO 5，兩機都備有約2,100萬像素及雙對焦系統，一於測試吓邊部係抓拍對焦王！

M9+相機升級版售價：$4,998（a）<br>PRO 5售價：2,799人民幣（32GB）、3,099人民幣（64GB）（b）

M9+相機升級版售價：$4,998（a）
PRO 5售價：2,799人民幣（32GB）、3,099人民幣（64GB）（b）

One M9+升級雷射對焦

今個星期發布嘅One M9+相機升級版，聽個名就知係旗艦機One M9+嘅強化版本，台灣稱佢為極光版。機Gor問過廠方老友，原來佢哋唔想用家混淆，希望用家一聽個名就知新機嘅賣點咁話。雖然佢同原版嘅外觀、體積和配色都一模一樣，但機背鏡頭加入「Laser AF」雷射對焦，老友仲話M9+嚟緊會停賣，全面換晒升級版。

PRO 5港行下月推出

Meizu進軍手機市場都有好幾年，依家主要分為入門嘅魅藍系列及元祖MX系列，當中後者有MX4、MX5等主線之餘，更開發出全新PRO旗艦系列。而PRO 5作為頭炮，9月尾先喺北京發布，內地啱啱開賣，機Gor收到風港版約11月中推出，備有3GB RAM + 32GB ROM及4GB RAM + 64GB ROM兩個版本，仲有金、白、銀黑色選擇。

M9+相機升級版繼續玩雙色調金屬設計，外觀夠Grand。	M9+相機升級版機面備有UltraPixel鏡頭，兼有BoomSound雙前置喇叭。	PRO 5改用USB Type C插口，周邊配件暫時唔易搵得到。
PRO 5支援雙卡雙待、中港3G/4G制式，外遊公幹一機搞掂。

第一回合：鬥對焦畫質

影寵物最緊要眼明手快，一轉眼隻貓咪就唔知閃咗去邊。M9+及PRO 5分別採用2,100萬像素及2,116萬像素鏡頭，解像度分別不大，最橋係兩機都植入Laser AF及PDAF雙對焦系統，會自動因環境而轉換，例如室內較昏暗時會用Laser AF，令對焦準確性和速度大幅提升。講多無謂試拍最實際，機Gor搵貓仔做Model，發現兩機由待機到啟動鏡頭拍攝都好快，按快門時已能同步對焦Snapshot，唔似得以前啲手機要慢慢Focus；若改用篤芒對焦，M9+相機升級版稍稍比PRO 5爽手。畫質方面，機Gor將貓相喺電腦放大，發覺兩者清晰細緻，雜訊處理得幾好，這回合握手言和。

M9+相機升級版對焦速度夠快，一篤芒即可準確對焦，幾乎冇Delay，雜訊控制唔錯。

M9+相機升級版對焦速度夠快，一篤芒即可準確對焦，幾乎冇Delay，雜訊控制唔錯。

PRO 5抓拍時對焦及快門幾乎同步，細睇貓毛都好清晰，白平衡準確。

第二回合：鬥攝力特效

除咗對焦速度和畫質，有時用手機抓拍都會影吓搞鬼相，M9+備有新鏡頭設計，支援貼紙相機、分鏡拍攝等功能，又可為相片加入雙重曝光、人臉融合等特效，齋玩Mode都有排玩。至於PRO 5嘅拍攝介面有點像iOS，內置微距、全景、美顏等基本功能，較過癮係支援「光場」模式調校景深，不過效果就冇咁自然。

鏡頭上方加入laser AF模組。	M9+提供多種特效拍攝模式，玩味十足。	一體式雙閃光燈，可將畫面色溫校得更準。
PRO 5於畫面向左掃即可轉換拍攝模式，提供即時濾鏡效果。

第三回合：鬥指紋付款

指紋辨識已成為旗艦手機嘅必備配置，M9+相機升級版及PRO 5嘅指紋辨識器都擺喺機面嘅Home掣。由於PRO 5不設返回鍵，所以操作時輕觸一下時係Back、按實就變成Home；而其指紋辨識功能叫做mTouch 2.1，反應比上代快，只係「指紋支付」功能暫時喺香港用唔到，得物無所用！M9+則支援支付寶認證，可透過指紋代替密碼完成付款過程，鍾意網購嘅人士必Like。

M9+嘅指紋辨識器位於輕觸式Home鍵，反應都幾快。	可透過指紋認證喺支付寶付款，網購更方便。	PRO 5指紋辨識器備有輕觸及長按操作，初用時要適應一下。
雖然備有付款功能，但香港唔啱用。

DCFever網站總編輯Jeffery：「預測寵物行走路線！」

「其實用手機影寵物，最緊要係位置正確，事先應預測寵物移動路線，對焦自然十拿九穩。當然，啟動鏡頭及對焦速度快嘅手機，影到可愛寵物相嘅成功率自然較高。今次兩款新手機都內置手動模式，建議將快門速度調校至1/500秒，就算寵物走動時，影出嚟都唔會矇查查。」

機Gor Report：M9+相機升級版　攝力夠撐

論硬件規格，其實PRO 5稍稍佔優，皆因它用上Exynos 7420八核心處理器，即係與Galaxy S6、Note 5等機王同一枚晶片，效能較MediaTek八核心處理器強。不過機Gor用嚟影相、玩Apps，兩機速度同樣流暢，操控介面及特效功能更是HTC較為成熟。若是喜歡抓拍和影寵物的話，機Gor推介M9+相機升級版；但一般使用的話，PRO 5性價比則較為吸引。

One M9+相機升級版規格表

制式：GSM、WCDMA、TD-SCDMA、FDD-LTE、TD-LTE

處理器：MediaTek MT6795T八核心

記憶體：3GB RAM、32GB ROM、支援microSD

屏幕：5.2吋（2,560×1,440解像度）

鏡頭：（前置）UltraPixel、（後置）2,100萬像素

電池容量：2,840mAh

作業系統：Android 5.0

體積：150.99×71.99×9.61mm

重量：168g

PRO 5規格表

制式：GSM、WCDMA、TD-SCDMA、FDD-LTE、TD-LTE

處理器：Samsung Exynos 7420八核心

記憶體：3GB/4GB RAM、32GB/64GB ROM、支援microSD

屏幕：5.7吋（1,920×1,080解像度）

鏡頭：（前置）500萬像素、（後置）2,116萬像素

電池容量：3,050mAh

作業系統：Android 5.0

體積：156.7×78×7.5mm