Mizaki@FFx 6個紅球考腰力

節奏更明快

以往提起桌球，十居其九聯想到爛仔運動，但隨着「神奇小子」傅家俊在球壇取得佳績，香港人對這項運動開始改觀；加上「四眼妺」吳安儀兩奪世界冠軍，令其擅長的「6個紅球」大熱起來。區教練表示︰「6個紅球又叫Six-red snooker，顧名思義紅球數量由15個減至6個，所以一Cue清枱最高會由147度減至75度，變相加快比賽節奏，更刺激好玩。由於比賽時間較傳統桌球短，對體力要求較低，十分適合女士玩。」

不容一絲犯錯

Mizaki自稱「桌球小天后」，甫到場就話要挑戰教練，最後被大勝60幾度才如夢初醒，仲話要拜師學藝，區教練當然悉心指點︰「打桌球除咗講天分，姿勢都好重要。Mizaki嘅腰冇力，所以要先練好站姿，兩腳前後站立，避免分得太開，腰板挺直，重心自然平穩。」他補充，枱上的桌球數目減少，障礙少了更有利進攻，但亦意味追分變得困難，所以首要盡量減低失誤。

Mizaki指6個紅球可訓練集中力同思考力，鼓勵「絲打」多些參與。	將紅球數量減至6個，一Cue清枱最高為75度。	區少偉身兼亞洲花式桌球聯盟教練，即席表演花式。

了解Foul and Miss

6個紅球的計分方法、顏色波擺位及規例，基本上與15個紅球大致相同，為求速戰速決，近年遂引入一條來自美式9號球比賽的球例「Foul and Miss」。區教練解釋︰「我哋叫做無意識救球，球手救士碌架時，若救球不中，球證有權判作Foul and Miss，然後把白波放回原位，直至救中為止。若果連犯5次，球手有機會被罰打多次，或讓對手選擇把白波放喺枱上任何位置打，變相送分畀人。」

桌球棍主要分楓木（左）及白蠟木（右）兩種。	被Set士碌架後，球手要盡力救球，否則會被判Foul and Miss。	區教練所屬的水兵桌球會不時舉辦訓練班，有意者可透過官網（網址：1q147.com）了解詳情。

篤完波跳Sugar Baby

打顏色波亦有地方需要注意，目標球不能當作障礙使用，「例如我打黑柴，打完後個黑柴唔可以遮住目標，否則就違例。簡單嚟講，6個紅球希望比賽明快地進行，所以唔鼓勵Set波！」學咗一輪，Mizaki又覺得點呢？她表示：「其實篤波有啲似捉棋，局局唔同既能訓練思考，打嘅速度又快好多，真係幾好玩。」為咗報答教練，Mizaki隨即在波樓表演成名作《Sugar Baby》，打完桌球跳舞都唔會「軟皮蛇」咁款，怪不得引到現場大量波友畀Like！

桌球身法 揸桿 拇指向上挑，四指張開平放桌球枱上，與白波保持6至8吋距離。	站姿 兩腳前後站立，避免張得太開，同時腰板要挺直，下巴貼近球棍免得頭部左右移動。	推桿 手肘成90度，下臂前後擺動帶動球桿，像鐘擺一樣推出去。
吳安儀 有「四眼妹」之稱的吳安儀，父親吳任水為香港桌球壇名宿，她13歲開始跟父親學打桌球，2010成為全職運動員，今年成功衞冕全英錦標賽。	葉蘊妍 女子桌球壇大師姐葉蘊妍，曾奪第一屆香港女子桌球公開賽冠軍，2010年亞洲運動會夥拍吳安儀和蘇文欣，取得女子6個紅球團體金牌。

公開賽下月舉行

為推廣6個紅球運動，香港桌球總會將於今年11月1日至12月19日舉行6個紅球公開賽，截止報名日期為10月19日，一Cue最高度數者可獲獎金$3,000及獎盃乙座，大家想一試身手就快啲報名啦！

撰文︰陳志滔

攝影︰張群生

鳴謝︰水兵桌球會