慢快門三式活現火龍

每年中秋節除了維園的綵燈晚會逼滿人之外，附近嘅大坑一樣咁熱鬧，皆因晚上舉行的傳統舞火龍活動，吸引大批影友和遊人拍照。其實想影到動感火龍靚相除了要霸個靚位，仲要有不少拍攝技巧，今次一於請藝風多媒體創意學院顧問兼大坑舞火龍大會攝影師姚佑雄，醒各位慢快門三式，教大家「曝」捉火龍動態。

利用慢快門影轉動嘅龍珠，火光呈現線性零舍有動感。

忌用閃燈直打

大坑舞火龍喺今、明兩晚7:30pm左右舉行，唔少人都帶備閃燈，諗住「直打」火龍影得真身，可是拍攝火龍的清晰度還是其次，最重要反而係氣氛和意境，姚佑雄表示：「其實我唔主張用閃燈影火龍，事關閃燈只會影到火龍上的一支支香，影唔到應有嘅火光，啲香全部變晒『白頭』。我建議大家將相機調至快門先決，快門速度大約1/15s或1/30s左右，影出嚟嘅火龍更有神韻。」影友最好一開始或者喺換香後影相，事關香燒到一段時間就會變短，影出嚟就冇咁靚。

Pan鏡拍出動感

單靠慢快門係唔夠嘅，想火龍更加「生猛」，仲要加少少拍攝技巧。「舞火龍係有特定路線，而且經常會『之』字形咁走，若果能夠預測火龍位置，拍攝時不妨以慢快門配合Pan鏡橫向拍攝，既能令火龍更Sharp，背景亦會變為線性，顯得特別有動感。」至於構圖技巧方面，姚佑雄指出要影到追逐龍珠的畫面，千祈唔好龍頭疊龍珠，應該在兩者中間預留虛位，配以廣角鏡高抄，可影到「火龍爭珠」和「打龍餅」等靚相。