拆解水底攝影浮游美態

留意場地服飾

別以為水底影人像照好簡單，其實有好多嘢需要準備，如潛水設備、泳池場務等，Sam Yu指出：「好多人本身唔熟水性，落到水特別緊張，甚至會面容繃緊，所以我哋會預先同佢練習，令肢體和臉部盡量放鬆，影出浮游水中嘅優美姿態。」不過場地先至係最重要一環，事關香港好難搵到泳池可供拍攝。就算泳池有檔期，租賃費用都唔平，一個鐘頭至少要$3,000~$4,000。

水底拍攝唔單止變數比地面多，服飾一旦濕水就好難做到飄逸效果，有啲衫褲又特別浮水。「有次拍攝欖球員造型照，件欖球衫本身好浮，需要分別喺膊頭和腰間加上鉛塊，甚至要在水面搵人踩佢落水。」呼吸方面，其實水底會有潛水員負責畀氧氣，最重要係擺甫士時動作要盡量慢，以免揚起太多氣泡破壞畫面。

真正落水嘅不僅有模特兒和攝影師，還有潛水員和助手等。	水面光線係主要光源，要準備多支影樓燈來玩出不同效果。	Aqua Pixies首席攝影師Sam Yu替客人拍攝水底人像，費用為$20,000起（1人/ 2.5小時）、$40,000起（2人/ 4小時）。 網址：www.aquapixies.weebly.com
Canon EF-S 10~22mm廣角變焦鏡頭。售價：$4,980（a）	Sea & Sea防水殼及鏡頭罩。 售價：約$9,000~$25,000（防水殼）、約$3,000~$7,000（鏡頭罩）（b）	Sea & Sea水底閃光燈。 售價：約$2,000~$7,000/支（b）
Sam Yu的水底人像拍攝器材，主要以單反加防水殼及閃光燈。

廣角鏡影全身

水底人像所用的拍攝工具，同大家去影海洋生態的器材差唔多，Sam透露：「我自己用Canon單反相機，由於水底人像照大多數影全身，所以主力會用10~22mm等廣角鏡頭，另會加裝Sea & Sea專用防水殼及水底閃光燈，當然泳池邊都會Set好影樓燈補光。」由於水底拍攝常有偏色問題，影出嚟嘅紅色會冇咁明顯，所以後製時會調校白平衡和色調，並執走礙眼的氣泡和瑕疵等。

專業攝影師嘉安表示，今次維港泳Project主要以Canon 單反拍攝，總共用咗3天時間。	魯芬呢個造型花咗兩個鐘化妝，不僅採用防水化妝品，身上還塗上特別顏料。	達哥喺水底試咗幾次都睜唔開眼，所以最後要戴潛水鏡。

分享拍攝點滴

至於負責操刀維港泳水底宣傳照的專業攝影師嘉安，今次幫Kay、曹星如、達哥等城中名人拍攝，過程遇到不少難題。他表示：「唔少人落到水未必可睜開眼，而且喺水中影得耐，眼睛會出現紅筋，好似幫達哥影相時，就要出動潛水鏡才能成功拍攝。」另外，唔好以為落水影相就唔使化妝，「水底人像攝影都會用到防水化妝品，尤其是拍攝魯芬時連身上都要塗上特製顏料，雖然單係化妝就用咗兩個鐘，但出來滿有戲劇效果。」

撰文：黎子豪

部分攝影：林資凱（部分由受訪者提供）

查詢電話（產品）：（a）3191 2333、（b）2724 1322