前女車手Wings MINI JCW試出真跑味

鄧穎詩（Wings），來一試MINI旗下最勁又最Powerful的John Cooper Works（JCW）。

17歲參加歐洲F3000賽車

歐洲（Euro）F3000是一個僅次於F1一級方程式的賽車活動，一直以來是不少車手升上F1的踏板。13年前，年僅17歲的Wings便加入了意大利Euro 3000 Racing Team，落場參加F3000賽事，因而獲得「女版舒麥加」的稱號，她的駕駛技術毋庸置疑。及後Wings於HKU新聞系畢業，做過ESPN體育記者，現於商界發展，已婚並育有一子一女。雖然已好耐冇落場，但在Wings的丈夫和一對子女眼中，她是一位「超級女車手」。

坐在JCW Dinamica真皮跑車桶椅的Wings，大讚對腰間的包裹效果分外突出。	後排雙座位空間尚可，中等身材男士亦可安坐。	門檻配上JCW專用款式，彰顯高性能身份。

靚師奶不減揸車熱誠

雖然Wings已是「靚靚小師奶」，但咁多年來，她對車的酷愛、對揸車的熱誠，依然冇變。手車，依然係咁掂。當Wings知道有機會試駕MINI JCW，因此火速應承接受訪問，並表示：「新MINI JCW的高性能表現比歷代任何一款MINI車型都要強，此車曾於蒙地卡羅拉力賽奪得錦標，所以一直都好想試揸呢架裏裏外外都咁有跑味嘅MINI。」

車頭蜂巢式鬼面罩展現濃濃的辣味。	Wings很喜歡小尾翼的設計，一來夠跑味。二來打開尾門，又啱啱好不會壓住條天線。	大型的MINI Radio Visual Boost屏幕的圓形框邊，同樣注入了JCW元素。

Aerodynamic Kit跑味濃

甫見到MINI JCW，Wings已有說不完的話：「嘩！車頭及兩側的導流槽都裝晒JCW擾流套件Aerodynamic Kit，唔單止降低風阻幫到手，仲令跑味更突出。鬼面罩及導流槽配以蜂巢式設計，加上頭冚貼上雙JCW賽車專用條紋，揭背上的尾翼，直頭辣味爆錶。最欣賞是預留了小凹位的獨特尾翼，當尾門打開時，不會壓住條天線，設計相當細心。」然後她走入車廂，並說：「部車內籠好靚，入面嘅顯示屏同車內有不同顏色的氣氛燈好有格調。我好鍾意包住圓形大屏幕的飾邊，用了來自賽車的黑白格仔旗圖案點綴，連儀錶板的車速錶，時速200km/h或以上的刻度，亦注入了黑白格圖案，令跑味更突出。」

大讚加速爽快重心穩

講完一輪，Wings駕駛JCW在附近「兜圈」，連人帶車隨着尾喉發出咆哮聲絕塵而去。她回來時表示：「起步時我透過波棍台環將駕駛模式調至SPORT，波箱及引擎反應即時變得敏銳，同時尾喉會發出咆哮聲，帶來猶如賽道的感覺。部車馬力好夠，起步豐盈有力，接近2,000rpm已感受到渦輪增壓介入的那股澎湃力量，直路加速爽快有勁，攻彎出色，重心低及跑化懸掛令高速疾走貼地穩定。部車加咗意大利名廠Brembo跑車煞車系統，煞車好明顯敏感度高咗，反應又直接，踩完可在短距離內煞停。而且部車真係好Go-kart，Direct Steering（轉向直接）、Handling都好好，精準易控。」

配上2.0L直四TwinPower Turbo引擎，擁有231hp最大馬力。	切合手形的控制器設於波棍後方，操作就如滑鼠般，可以輕易切換各項設備。	放大圖片

後記：接送子女溫情滿載

Wings於試車後，便要趕去接子女放學。她笑言自己日日都當「車手」，平時除了返工見客，還會負責接送子女返學放學和放假載他們出街。5歲的兒子有時會跟她說：「媽咪，快啲過咗架巴士啦！」接着又說：「好嘢！媽咪你過咗佢喇！」然後妹妹跟着拍掌，看Wings邊說邊流露的冧爆笑容，都感受到她相當嚮往現在的「車手」生活。

規格表

車型：三門四座位揭背跑車

引擎：直四渦輪增壓

容積：1,998c.c.

最大馬力：231hp/5,200~6,000rpm

最大扭力：320Nm/1,250~4,800rpm

驅動：前置引擎、前輪驅動

傳動：六前速自動波箱

懸掛：（前）麥花臣、（後）多連桿

制動：（前、後）通風碟

車身體積：3,874×1,727×1,414mm（長×闊×高）0~100km/h：6.1秒

撰文：林登麗

攝影：張錦昌

查詢電話：3193 6800（MINI HK）