最近好興「一句激嬲阿媽」、「一句惹毛電影人」、「一句激怒記者」……等等的Facebook Page，好多都好好睇，但嗰啲「激嬲」、「惹毛」、「激怒」字眼始終不及「撻着」咁傳神，完全表達出廣東話神奇準確之處。
有個叫「一句撻着設計師怒火大賽」嘅Page，就從Page名開始，到設計師出Post內容，再到啲留言，都係非常精彩。
呢個Page最出名嘅一個Post，就係「同我執走架的士佢」，附圖奉上街景一張，有一架的士泊咗喺茶餐廳門口之外。
呢個Post精彩之處，在於有大量疑似設計師挺身而出代出Post者「執走咗」架的士──用特別的改圖技巧，例如搵阿葉劉外遊西國嘅美麗身影遮住架的士、搵架Uber車擺咗喺的士個位、搵隻進擊的巨人食咗架的士，應有盡有，笑到想嘔。
其實這類叫人執相，然後樓下用盡方法搞事嘅Post，出現過好多次，多由內地傳過嚟，嗰啲都好笑，但今次一架的士加一間茶餐廳，本土味濃，睇得人特別投入，再加上一堆設計師嘅怒火，令人笑中有淚，笑到好累。
跟住落嚟，大家再開啲乜嘢「一句撻着」好呢？
自嘲夠了，好嘢冇理由唔益吓其他人。例如整個「一句撻着阿梁特」？「一句撻着阿葉劉」？相信又會有一場腥風血雨。
網址：www.facebook.com/linrixi