E-M10 Mark II 五軸防震追叮叮

有人話行路都快過電車，但對於影友嚟講，無論「叮叮」行得快定慢，雙手唔夠定一樣會鬆郁朦。Olympus全新M4/3無反相機OM-D E-M10 Mark II，加入招牌的五軸防震功能，無論手持Snapshot抑或Pan鏡都能夠捕捉「叮叮」靚相。

OM-D E-M10 Mark II加入五軸防震功能，無論手持Snapshot抑或Pan鏡都能夠捕捉「叮叮」靚相。

每秒8.5張連拍

Olympus是最早使用五軸防震的廠商，能作水平、垂直等多方位修正，屬廠方的招牌功能之一。E-M10 Mark II植入此功能外還加入4級減震能力，不僅影相時能使用，仲兼容OM-D Movie拍片，手持拍攝可保持動態或靜態影像穩定。今次小記利用新機的連拍功能，以每秒8.5張速度連拍電車，在高速快門和五軸防震加持下，就算電車移動時，張張相都咁Sharp。

捽芒揀對焦點

新機配備236萬像素電子觀景器，取景鮮色又明亮，還增設「AF目標觸控板」功能，當用家以觀景器取景時，只要用手指捽機背3吋屏幕，便可快速揀對焦點，唔使再用十字桿逐格揀選81個對焦點，操控爽手好多。新機另加入模擬光學取景器功能，無論增減曝光設定，甚至調校不同白平衡，觀景器的取景畫面都唔會變色，似足大機的光學觀景器（OVF）。

售價：$6,690（連14~42mm電動鏡頭套裝）

用上3吋輕觸式屏幕，能夠上下翻揭，低抄電車冇難度。

用觀景器取景時，可透過「AF目標觸控板」以手指捽芒選擇對焦點。

全新機身設計

其實E-M10 Mark II都算誠意十足，唔係改少少硬件就當新機出，至少機身經過重新設計，特別將模式轉盤和前後轉盤加高，對於手大的男士來說，手感有所提升。值得一提，新機支援Wi-Fi功能，快將更新的《Olympus Image Share》2.6版App，將加入Live Composite功能，簡單來說是能夠透過智能手機，實時玩日光Light Painting，對用家來說是一大喜訊。

用上236萬像素電子觀景器，取景畫面色彩鮮艷明亮。	內置彈出式閃光燈，同時備有Hotshoe插座作擴充。	機背的按鍵變得簡潔，而且設有十字桿操作。
模擬光學取景器功能即係扮OVF，調校曝光等設定時畫面唔會變色。	連拍速度提升至每秒8.5張，可以好似機關槍咁連拍電車。	機頂的模式轉盤和操作轉盤大幅加高，操作比以前更就手。
試相區五軸防震有效解決手震問題，就算拍攝移動中的電車都能快速鎖定。而相片成像實淨銳利，色彩還原度高。