GR II Vs X100T懷舊抓拍

Ricoh GR II潮人恩物

Ricoh GR系列一直係潮人愛機，記得10年前初代GR Digital推出時，日本潮流教主藤原浩、香港E神陳奕迅等潮人都用過，搞到坊間勁多人追捧。

呢個系列幾代以嚟都採用細Sensor，直至改用APS-C尺寸感光元件後重新叫回GR，外觀冇乜點變，沿用28mm定焦鏡頭，最近推出的GR II仲植入Wi-Fi功能，玩得更潮。

機頂備有模式轉盤，支援多種進階曝光模式。	按一下Effect鍵能用上濾鏡特效，長按則開啟Wi-Fi功能。	用上機械式操作，提供快門轉盤和曝光模式轉盤。
設有混合式觀景器，同時兼備光學和電子設計。

規格表

感光元件：1,620萬像素CMOS

焦距：28mm

光圈：F2.8

屏幕：3吋123萬像素

感光度：ISO 100~25,600

體積：117×61×34.7mm

重量：221g

GR II配備的28mm鏡頭，能表現出前大後小的透視感，銳利到連樹根和細紋都睇得清楚。

雖然X100T的35mm焦段冇咁Wide，但邊位沒有變形，而且色彩和反差充滿菲林味道。

Fujifilm X100T混合觀景器

Fujifilm X系列的外形走復古路線，X100系列更加入混合式觀景器，當年廠方首創此技術，利用光學觀景器取景，同時能顯示拍攝參數，仲可切換到電子觀景器，一物二用令業界嘩然。身為第3代的X100T沿用混合式觀景器，並加入實時視差校正功能，取景時會有對焦框的放大畫面，方便影友進行手動對焦。

GR II對應的《GR Remote》功能齊全，亦能夠篤芒對焦，不過一去到網絡盲點就開唔到。

X100T支援《Camera Remote》App，實時顯示的畫面冇起格，最重要是連線和操控夠爽快。

規格表

感光元件：1,630萬像素CMOS

焦距：35mm

光圈：F2

屏幕：3吋104萬像素

感光度：ISO 100~51,200

體積：126.5×74.4×52.4mm

重量：400g

GR II的復古效果能夠調校飽和度並加入黑角，淡淡色調充滿懷舊風味。

X100T的玩具相機效果有點過度偏黃，而且無法進行微調，唔夠自然。

影相鬥畫質

GR II與X100T同樣採用1,600萬像素左右的CMOS感光元件，基本畫質旗鼓相當，機Gor到近期備受關注的般咸道石牆拍攝，利用GR II的28mm廣角鏡頭，透視感相當強，而且銳利度高，拍攝風景特別啱Feel。至於X100T的鏡頭用上35mm焦段，相比之下冇咁Wide，但35mm可說是Snapshot的最佳焦段，變形相對較少，配合Fujifilm獨有的菲林味道，顏色和對比層次豐富，可說各有所長。

手機鬥操作

用相機Snapshot梗係想第一時間同人分享，機Gor於灣仔藍屋拍攝時，透過GR II的Wi-Fi和NFC功能傳相，由於佢毋須裝App，利用手機瀏覽器上官網的《GR Remote》便能遙控，內裏有埋電子水平儀，介面功能都好齊，但最大問題係電訊商網絡若收得唔好，便有機會用唔到此功能。另一邊廂，X100T透過SSID與手機配對，毋須密碼即可搜索並連線，加上《Camera Remote》App的介面簡潔易用，實時顯示畫面清晰，遙控對焦又夠快，機Gor最Buy。

濾鏡鬥玩味

想影出懷舊味道，不少人會加入濾鏡特效，機Gor行經正在拆卸的灣仔同德大押抓拍，GR II內置10款濾鏡咁多，當中包括黑白效果、復古效果，最正係每款效果都可以進行微調，而復古效果更可調校飽和度、對比度、鮮明度，並能加入黑角令變化更多。X100T的濾鏡特效則有13種咁多，數量稍為優勝，但實際以玩具相機效果充當懷舊Feel，或靠軟片模擬的色調去扮菲林效果，加上冇得微調設定，難免有啲輸蝕。

專業攝影師Raymond Kam：「背景切忌太多，Less is More！」

「要拍出懷舊感覺，首先要從取景開始，拍攝時盡量唔好貪心地捕捉太多景物，事關可能會破壞構圖。至於鏡頭焦距唔使太Wide，今次兩款DC分別提供28mm和35mm就啱啱好，皆因以前菲林年代絕少16mm或24mm這些超廣角焦段。此外，拍攝時不妨將白平衡設定為陰天或者6,000K以上，能夠為相片營造出懷舊效果，亦可以後期推高雜訊，模仿菲林相的粗糙感。

機Gor Report：X100T懷舊主題冇得輸

機Gor成日扮文青，無論Ricoh GR或Fujifilm嘅菲林機都用過，感覺X100T特別啱Feel，金屬機身加上機械式操作，抓拍時好似時光倒流玩番菲林機嘅感覺，而且影出來又似足菲林相，拍攝懷舊主題真係冇得輸。至於Sell潮味嘅GR II，勝在機身輕便，單手Snapshot冇難度，影完相仲可即刻袋入衫袋或褲袋，真正做到隨心抓拍，相信亦有一定市場。

撰文：機Gor

查詢電話：2926 2300、2406 3225