草蜢獨木舟至Green生態遊

艇身闊添穩定

西貢藍天水上活動中心剛引入了32艘草蜢獨木舟，當中分為單人艇同雙人艇，帶隊嘅教練Jacko話今個夏天引入以來，差不多每個周末都Full Booking。到底佢有乜吸引之處？他表示：「草蜢獨木舟的艇身較闊，划出大海會比較穩定，而且收納位較多，除了在艇尾備有防水袋或運動包的收納空間外，艇艙亦有空間擺水壺、相機等小物。」小記將GoPro、浮潛器材等物件放晒落去架艇仲有位剩，若是釣魚發燒友的話，仲可帶埋魚竿等出海垂釣呢！

綠色外形易認

新艇用上草蜢綠色，除咗夠搶眼之外，另一原因是基於安全考慮，讓教練容易觀察和辨認得到，第一時間作出拯救。握槳方法以兩手距離跟曲臂闊度大致相同就可以，落槳時將槳面45度角入水就最慳力，若想轉左或轉右時只需於相反方向落槳即可。就算真係從未接觸過獨木舟都唔使怕，教練會於落水前教導基本划艇動作，而且學員必須穿上救生衣，就算在海浪較大的外海玩都夠安全。

草蜢獨木舟較闊身和穩定外，還設有不少儲存空間。	在艇身中央設有儲存空間，可寄放浮潛器材等物件，艇尾仲可綁上防水袋。	中心備有16架雙人艇，就算不懂得扒獨木舟，都可由教練殿後。

快艇輔助更爽

雖然玩家可以從水上活動中心直接租草蜢獨木舟在近岸玩，但想玩得盡興梗係去遠啲啦！教練推介不同行程的連快艇玩法，可以體驗自然生態，當中分為半日（3小時）或全日（6小時）兩種，中心會提供教練、器材及保險等，集齊8個人便可預約。教練話以快艇輔助可更快到達目的地，有多啲時間睇靚景外，遇着天氣、水流突變的話，都可幫大家盡快離開，講到底都係安全為先！

不選擇連快艇的生態團，在西貢碼頭沿岸划艇都相當舒服。	將雙手90度曲起，兩隻手掌之間的距離為握槳的最佳距離。	落水前，教練Jacko會先教各位握槳及落槳竅門。

睇紅樹穿山洞

中心提供多種生態獨木舟團，如果半日團可去鹽田梓同橋咀島，前者離西貢碼頭較近，約15分鐘船程可達，最出名當然係島上嘅紅樹林；後者可以玩到浮潛，睇吓海底嘅珊瑚。如果玩全日團的話有3條路線可揀，而且包埋簡單午餐，實際行程可同中心商議作出修改。第1條路線包括鹽田梓和橋咀島，另可玩埋甕缸洲，島上大部分屬於早白堊世滘西洲火山岩群，沿岸盡是六角火山岩柱，而島上的沙塘口洞更是東海四大海蝕洞之一，夏天時很大機會可以扒獨木舟穿過。第2條路線可直接駛到糧船灣沿岸一帶，由於屬開放水域，水質較清，適合玩浮潛賞珊瑚。至於第3條路線係滘西洲，這裏除了有靚沙灘外，沿岸可見不同時代形成的火山岩，其南面長期受海浪侵蝕，因而形成外形猶如金魚尾的吊鐘岩，當中內藏一個高達30米的海蝕吊鐘洞，大家可以扒獨木舟近距離欣賞。

第1條生態路線：紅樹怪石遊 鹽田梓最出名是島上的紅樹林，扒獨木舟可沿岸慢慢欣賞紅樹生態。	第2條生態路線：浮潛賞珊瑚 糧船灣附近水質較清，帶埋浮潛器材便可欣賞珊瑚及與魚仔游水。	第3條生態路線：穿越吊鐘洞 位於滘西洲的吊鐘洞高達30米，有機會扒獨木舟穿越其中。

獨木舟生態團

費用：$650/位（半日3小時）、$850/位（全日6小時包午餐）（至少8人成團）

查詢電話：2791 0806

撰文：布偉倫

部分攝影：謝孝祥

模特兒：Nie